Puiaasat utertitat kalaallit meerartaasa iluaqutigissavaat
Siorna SuperBrugsenimut puiaasat utertitat aqqutigalugit 7,7 millioner koruunit suliniutinut pitsaasunut tunniunnearput, Red Barnet-ilu aalajangerpoq aningaasarpassuit Nunatta avannaani sunngiffimmi sammisassaqartitsinermut atorniarlugit.
- Ukiut qulit kingulliit meeqqat Upernavimmi Qaanaamilu sunngiffimmi ornittagaqarnissaat taamalu oqqiffissaqarnissaat tamaviaarutigisimavarput. Pingaaruteqarpoq tarferuusaaginnarnermit nalunartoqartaqisumit allamik periarfissaqarnissaat, Red Barnet-ip Nunatsinni suliniutaanut ataqatigiissaarisoq Dorrit Hermann oqarpoq.
Inuusuttorpassuit avannaani nunaqarfiit qimallugit ilinniariartortarput. Inunnulli allanut attaveqarneq killeqarsimagaangat angerlarsimaffik ungasinnerusutut misinnartarpoq, taamaasigaangallu ilinniakkamik taamaatitsiinnarnissaq qaninnerulersarpoq taamalu iluatsinngitsoorluni angerlaannartoqarsinnaasarluni.
- Meeqqat inuusuttullu Upernavimmi Qaanaamilu ornittagaqartinnerisigut siunissaq ungasinnerusoq isigalugu siunertaavoq imminnut isumagisinnaanngornissaat. Uagut suliarput aammalu atuisutta nammineq suliniuteqarnerisa ataatsimut Kalaallit Nunaat iluaqusertussaavaat, Dorrit Herman oqarpoq, assullu nuannaarutiginerarlugu qallunaat naalagaaffeqatigiinnerup avannarlersaanut ikiuukkusussimanerat
Red Barnet ukiorpaalunngortuni Kalaallit Nunaanni suliniuteqarpoq. Angusaqarluartarsimapput naak suliniutit aallartinniarnerat imaannaanngittaraluartoq.
- Uatsinnut assut pingaaruteqarpoq ornittakkat aamma pitsaasunik imaqarnissaat qujanartumillu meerarpassuit neqeroorutivut ukiut ingerlaneranni atorluarsimavaat. Taamaasilluta qulakkeersimavarput meeqqat inuusuttullu ataatsimoorfissaqarnissaat neriuutigaarpullu tamanna pinerlunniarnermut ingalassimaarutaajumaartoq, Dorrit Hermann oqarpoq.