Pualangaarangamik aliikkusiartarfiup Disneylandip issiaviinut ingissinnaanatik

USA-mi Disneylandip aliikkusiartarfiisa ilaat matoratarsinnaapput, tassami taakkununnga ingerlasartut amerliartuinnartut ima pualatigilersimammata soorlu allaat ikkarlittalerlutik.

Disneylandimi aliikkusiartarfiit nuannarineqarnersaasa ilaat ”It’s Small World” – ”Tassa silarsuannguaq” – tassaavoq nunarsuatta mikisuarannguanngorlugu assilinera umiatsiannguamik angalaarfigineqarsinnaasoq. Aliikkusiartarfik ukiuni 41-ni atuussimavoq, ullumikulli inuit amerlaqisut angalaarnerminni ikkarlittalersimapput, tassami angalaartartut oqimaappallaalersimammata, The Times allappoq.

Amerikamiut agguaqatigiissillugu 1960-ikkunnut naleqqiullugu 11,5 kg-nik oqimaannerulersimapput, Amerikamiullu tamarmik 65 pct.-ii US National Center for Health Statistics naapertorlugu oqimaappallaartutut oqaatigineqarlutik.

Aammattaaq Danmarkimi ajornartorsiut naluneqanngilaq, takornariaq imatut angitigisarmat allaat pineqartoq issiavimmut aalajangerneqarsinnaasarani, tassa aalajangerfia anngussinnaanngimmat.

Tivolimi aliikkusiartarfik ”Dæmonen” soorlu qamutini tamani issiaveqarpoq XXXL-inik, taakkualu aalajangerfii allineqarsinnaallutik.