Psykologiunatik psykologitut suliaqartut ajornartorsiutaapput
Kikkulluunniit tarnip pissusiinik ilisimasalittut, tassa psykologitut ilinniagaqarsimanngikkaluarlutik, imminnut taama taagorsinnaalernikuupput, tamannalu ajornartorsiutaavoq.
Nunatsinni tarnip pissusiinik ilisimasallit katillutik 31-t Nuummi sapaatip akunnerani kingullermi ataatsimeeqatigiinnerminni tamannarpiaq ilaatigut oqillisigaat.
Kikkuluunniit tarnip pissusiinik ilisimasalittut taagorsinnaanerat ajornartorsiutaammat, tarnip pissusiinik ilisimasaqarneq pillugu Danmarkimisulli inatsiseqalertariaqartigut, tarnip pissusiinik ilisimasalittut ilinniagaqarsimasut isumaqarput.
Isumannaatsumik ilisimatusarnernillu tunngaveqarluni katsorsaanissaq inatsisinit qulakkeerneqartarpoq.
- Tarnikkut katsorsaanerit ilinniarsimasunit suliarineqartariaqarput, tarnip pissusiinik ilisimasallit peqatigiiffianni siulersuisut allapput.
Tarnip pissusiinik ilisimasalittut ilinniarneq ukiunik tallimanik sivissuseqartarpoq, taassuma saniatigut ukiuni marluni sulinermik misilittagaqarnissaq piumasaqaataavoq, tamatumalu kingorna immikkut ilisimasaqalernissamut ilinniaqqinneq ukiunik tallimanik sivisussuseqartarluni.
