Psykologit arlallit akuersissuteqarnatik sulipput

juunip 12-at 2005 16:41

Nuummi tarnip pissusaanik ilisimasallit Danmarkimi kattuffimmit ulluni makkunani tikeraartoqarput, tikeraartoqarnerminnilu nunatsinni ajornartorsiutit soorlu meeqqanik sumiginnaanerit minnerunngitsumillu sulinermi atugassarititaasut oqaluuseraat.

Danmarkimi tarnip pissusaanik ilisimasallit kattuffiata tupaallaatigeqisaanik, nunatsinni tarnip pissusaanik ilisimasalittut sulisut katsorsaanissamik akuersissuteqanngillat, tamannalu iliuuseqarfigineqartariaqartoq, siulittaasuat Roal Ulrichsen isumaqarpoq.

- Danmarkimi tarnip pissusaanik ilisimasalittut ilinniartut ilinniarnertik naammassigaangamikku katsorsaanermik akuersissutitaarniarlutik ukiuni marlunni nalinginnaasumik ingerlaqqittarput. Kalaallit Nunaannili sulisut ikittuinnaat ingerlaqqissimapput. Danmarkimi tarnip pissusaanik ilisimasallit kattuffianni siulittaasoq Roal Ulrichsen oqarpoq.

Roal Ulrichsen nassuiaavoq, Kalaallit Nunaanni sulisut 28-it akornanni taamaallaat arfinillit akuersissuteqartut, marluinnaallu suli qaffasinnerusumik immikkut ilisimasalittut, taamalu akuersissutinik tunniussisinnaasutut allagartaqartut. Nunatsinnili pissutsit allaanerunerannut tikkuagaasa aamma ilagaat, tarnip pissusaa pillugu immikkut inatsiseqannginnera.

- Inatsiseqanngimmat kikkut tamarmik tarnip pissusaanik ilinniarsimasutut imminnut taasinnaapput, Danmarkimili inatsiseqarmat tamanna inerteqqutaalluinnarpoq. Aamma inatsit maalaartarfeqarnissamut periarfissaqartitsivoq, tamannalu innuttaasunut kiffartuussineruvoq pitsaasoq. Tamannali Kalaallit Nunaanni aamma atugaanngilaq. Roal Ulrichsen oqarpoq.

Roal Ulrichsenip naalakkersuisut siulittaasuat Hans Enoksen oqaloqatigeqqammerpaa, pingaartumillu ilinniarsimasunik sulisussaaleqineq oqaloqatigiissutigisimavaat.

- Isumaqatigiissutigaarput, immikkut ittumik ilisimasallit tamaanga tikinniarneqassasut, tarnip pissusaanik ilisimasalittut sulisut katsorsaanissamut akuersissuteqanngitsut qaffassaqqinnissaannut periarfissinniarlugit, taamaalilluni aamma Kalaallit Nunaanni sulinissaq pilerinarnerulissammat. Roal Ulrichsen nassuiaavoq.

Nunatsinni sulinermi atukkat pitsaagaluarlutik ilinniaqqinnissamut periarfissakinneq sulisussaaleqinermut peqqutaaqataasartoq, nunatsinni peqatigiiffimmi siulittaasup tulliata Ann Nymarkip uppernarsarpaa.

- Marluinnaat immikkut ittumik ilinniarsimapput, taakkulu kisimik akuersissutinik tunisisinnaallutik. Taamaattumik ilinniaqqissinnaanissamut periarfissat sulisussarsiorluni pilerisaarinermi minnerunngitsumillu sulisooreersut tigummiinnarneqarnissaannut ilanngunneqartariaqarput. Ann Nymark oqarpoq.