P&S Werften inuulluaqquaat

Naak suliffeqarfik akiliisinnaajunnaaraluartoq RAL piffissaagallartillugu iliuuseqarsimavoq, aningaaserivimmiillu qularnaveeqqusiinerit atorlugit, umiarsualiorfimmut akiliutigisimasani sillimmasersimallugit. Tamanna pissutigalugu piffissami qanittumi aningaasat 400 mio. kr.-it utertittussaassavai. Taamaakkaluartoq RAL-ip umuiarsuaatini nutaarsuarnik tallimanik ilarusunnerugaluarpai.

-Hundrede millionilikkuutaanik kontumut nakkartoqarnera nuanniilliuutigissallugu misigisaavoq qaqutigoortoq, kisianni tassa taamatut maanna inissisimavugut. Umiarsualiorfiup ajutoornera malittaralugu misigisaavoq nuanninngitsoq, sukkasuumilli paasinarsaasoqarnissaa umiarsuarnillu nutaanik piniartoqarnissaa neriuutigaarput, Royal Arctic Linep pisortaanera Jens Andersen oqarpoq.

P & S Werftenip akiliisinnaajunnaalersoq paasinarsimmat Royal Arctic Line sammisaqarfii annertuut marluusimapput. Ingerlatseqatigiiffiup umiarsuaataasa pioreersut atasinnaassusaata sivitsorsarneqarnissaat qulakkeerniarlugu piareersaateqartoqarsimavoq, aammalu nutaanik umiarsualiortitsinissamut niuerfik misissorneqarsimalluni. Umiarsuit pioreersut atasinnaassusaata sivitsorsaavigineqarneri aallartisarneqareerpoq, ukiunilu aggersuni illoqarfinnut nunaqarfinnullu angallanneq ukiut siuliini ingerlanneqartoq malillugu ingerlasoqassalluni.

Aningaaseriviit qularnaveeqqutaat tiguneqareerpata aatsaat Royal Arctic Linep umiarsualiorfiusinnaasut tigussaasumik isumaqatigiinniarfigisinnaassavai. Piffissaq sivisunngitsup iluani isumaqatigiissuteqartoqarsinnaanera naatsorsuutigineqarpoq, umiarsuillu nutaat siulliit 2014-ip naanerani tunniunneqarnissaat naatsorsuutigineqarluni. Europami umiarsualiorfiunerusut misissuiffigineqarput.

P & S Werften ukiorpassuarni umiarsualiorfiugaluarpoq tatiginartoq pitsaasumillu tusaamaneqartoq, taamaammat ingerlatseqatigiiffiup aningaasaqarnera ajutoormat amerlaqisut tupaallaatigisimavaat. Minngerunngitsumik RAL-ip.

-Piareersaatitut suliavut sukumiisupilussuupput, siunnersortit pikkorissut atorpagut umiarsualiornerlu Tysklandimi aningaaseriviit aningaasalersuisartut annersaannit KfW-mit aningaasalersorneqarluni. Taamaammat pisut ingerlalertupallammata aarlerinartoqarsinnaaneranut takussutissanik takusoqarsimanngilaq, Jens Andersen nassuiaavoq.