Præsidentinngortussaq aalajangerneqangajalerpoq

Amerikami præsidentimut qinigassanngortittoq Barack Obama neriuppoq sapaatip-akunnerata tulliani præsidentitut suaarutigineqarumaarluni, unammillertaali Hillary Clinton suli aamma kimigiisertuarsinnarpoq.

Amerikami Demokraatit partiianni ilaasortat nuimanerit maanna oqaluuserilerpaat kiap præsidentitut qinigaanissaa qanittukkut aalajangerneqartariaqalersoq.

Barack Obama ajugaasutut imminut suaarutigineqassappat tapersersorteqarfianiit oqaatigineqarpoq taasisinnaatitaasut tapersersuisussat suli 43-t pissarsiarisariaqassagai.

Amerikami Innuttaasut sinnerlugit sinniisoqarfimmi pisortaq Nancy Pelosi oqarpoq qinigassanngortittut arlaannaalluunniit tunuarusunngiinnarpat qanittukkut akuliuttussanngussalluni.

- Ataatsimeersuarnissap tungaanut præsidentinngorniuttut unammiinnaavissinnaanngillat, erngiinnaq tassa naammassisariaqalerput, kina præsidentinngortissanerlutigu sapaatip-akunnerini qaninnerpaami aalajangertariaqalerparput, Nancy Pelosi taama oqarpoq.

Hillary Clintonilli suli aalajangiusimajuarsinnarpaa præsidentinngorniuttuni nammineq kakkannersaagami.

Arlalippassuilli isumaqarput Obamamut sanilliullugu kingullikuunerujussuusoq.