Præsidentinngorniutiinnaleqaat
Nalunaaquttap akunneri arlaqanngitsut qaangiuppata paasisinnaalissagunarparput USA-mi novembarimi qinersisoqalerpat kina demokratit sinnerlugit kinalu republikanerit sinnerlugit præsidentinngorniutissanersut. Maannakkorpiaq qinigassanngortittut Iowami qineqqusaaleruttorput. Mitt Romney aqagu qinigassanngortitsinissaq sioqqullugu qineqqusaaleruttorpoq, imaalluarsinnaavormi republikanerinit qinigassanngortinneq manna tikillugu qinerneqarnerpaajugami, Arkansasimi guvernøriusimasoq Mike Huckabee tullersortigalugu. Romneyp Huckabeellu Iowami qinersisartut republikanerit akornanni kristumiuulluartut amerlanerussuteqartut sunnerniarsaraat, aatsaallu kisitseqqissaarnikkut kina ajugaanersoq takuneqarsinnaassagunarluni. Demokratit akornanni qinigassanngortittut aamma taama imminnut qanitsigipput, tassa Ilinoisimiit senatori, Barack Obama, New Yorkimiillu senatori, Præsidentiusimasup nulia, Hillary Clinton qinigassanngortipput, manna tikillugu Obama qinerneqarnerulaarluni. Demokratilli akornanni John Edwards pissangatitsivoq, taannami tupaallattitseriaannaammat. Taamaammat Iowami sinniisussanik qinersineq kikkut præsidentinngorniunnissaannik tikkuussisaraluartoq imaassinnaavoq suli qaammat naallugu pissangasariaqarallassasut.
Republikanerineersut John McCain, Rudy Giulianilu aatsaat sapaatip akunnerini tulliuttuni qinigassanngortinnermut ilanngutissapput. Republikanerit demokratillu akornanni kikkorpiaat præsidentinngorniutissanersut, imaassinnaavoq aatsaat februaarip ulluisa tallimaanni qulakkeerneqarsinnaassasoq.
