Præsidentimut qinersinissaq piareersalereerpaat

USA-mi inatsisartunut sapaatip-akunnerani kingullermi qinersineq naammassisorlu præsidentissamik ukiut marluk qaangiuppata qinersinissaq piareersarneqalerpoq.

Præsidentingorniunnermi qinigassanngortikkusuttut ilaat kinaassanersoq ullumi eqqoriarneqarsinnaalerpoq. Republikanerini ilaasortap, Rudy Giulianip, qineqqusaarnissaminut immersugassat ullumi tunniussimagai, USA-mi tusagassiorfiit tusarliussipput. Taamaalilluni New Yorkimi borgmesteriusimasoq præsidentitut qineqqusaarusuummersimasoq pasitsattoqarpoq.

New Yorkimi septembarip ulluisa aqqarnganni 2001-imi qaartartumeerisoqarmat Rudy Giulianip ikiorsiisunik ataqatigiissaarilluarsimanini nersorneqaatigisarpaa. Taamanikkut sapiitsuliorluinnarluni ataqatigiissaarisimanera USA-mi præsidentinngornissaanut naammassanersoq pissanganarpoq.

Isumasiuinerit naapertorlugit republikanerit qinigassanngortitaat Rudy Giuliani præsidentimut qinersinissami siuttutut inissisimavoq.

Demokratit kina qinigassanngortissaneraat suli pissanngatigineqarpoq.

Siusinnerusukkut isumasiuinerit naapertorlugit Rudy Guilianip Hillary Clinton unammillertigissaguniuk ajugaaffigingaatsiassagaa takuneqarsinnaavoq.

USA-mi aappaaguagu novembarimi præsidentinngorniuttoqassaaq.