Præsidentimut qinersinissaq isumannaatsuutikkusuppaat
Afghanistanimi aggustimi præsidentimut qinersinissamut eqqissisimanerup qulakkeernissaa pineqartoq oqaatigineqarpoq.
- Ulluni kingullerni qulini sakkutuunik 15-inik annaasaqarnerput uppernarsarsinnaavara, taama oqarpoq Afghanistanip kujataani Helmandimi tuluit sakkutuuisa oqaaseqartitaat Nick Richardsson. Taassumali erseqqissarpaa asulersuaq sakkortuumik akersuuttoqarsimanngitsoq.
- Talibanit uatsinnit annaasaqarnerupput. Sakkutuut iligiillutik muslimit ingasattajaarniat tunuariartortilerpaat, siunnerfipput ajunngilaq, sakkutuut oqaaseqartitaat oqarpoq.
Tuluit ministeriunerata Gordon Brownip Tuluit Nunaanni inatsisartut ataatsimiititaliaanut allakkamini oqaatigaa, piffissaq kingulleq ilungersunartorsiorfioqisoq. Taamaattorli naak ilaasa periaaserput isornartorsioraluaraat, periaatsip eqqortuunera qularutiginngilara. Matumanimi pineqarpoq innuttaasut præsidentimut qinersinissap tungaasut isumannaatsuunissaat, ungasinnerusorlu isigalugu Afghanistanimi innuttaasut peqataatinneqarnerunissaat.
Amerikamiut præsidentiat Obama aamma taamatut isummersorpoq. Taassuma piffissami kingullermi sakkutuutik Afghanistanimiittut tuusintilikkaanik amerlivai.
- Aasap massuma ilungersunartuunissa ilisimareerparput, Obama oqarpoq.
Akersuuttarnerillu ataatsimut isiginnilluni nalilerneqartariaqartut erseqqissarlugu.
- Talibanit peqqarniisaarniarlutik Londonimik saassussisinnaanissaat ernummatissaavoq, immaqa Amerikamik saassussisinnaanerannit allaat ernumanarnerusumik. Taamaattumik ungasinnerusoq isigalugu Afghanistanimi isumannaatsuunerup aalajaatsumillu ingerlatsilernissap qulakkeernissaat pingaaruteqaqaat.
Piffissami kingullermi Amerikamiut sakkutuui sisamat aqqusernup sinaani qaartartumeerinikkut toqutaapput. Tamatumunnga peqatigitillugu NATOp oqaaseqartitaanit oqaatigineqarpoq, Talibanit aqqaneq-marluk iligiit sakkutuuinit toqunneqarsimasut.