Præsident Sarkozy-p nulia Libyami isumaqatiginniniariarpoq
Frankrigip præsidentertaavata nulia Cecilie Sarkozy maannakkorluinnaq Liibiamiipoq Liibiami oqartussat piumaffigiartorlugit bulgariamiut peqqinnissaqarnikkut sulisut arfinillit, lLibyamiut meerartaannik HIV-virusimik tunillaassuisimasutut eqqartuunneqarsimasut iperagaatinneqarnissaannut isumaqatiginninniariartorluni.
Cecilia Sarkozy aappassaanik Liibiamut tikeraarnermini kisimiinngilaq, EU-mi nunanut allanut tunngatillugu ministeri Benita Ferrero Waldner tkeraaqatigaa. Arnat taakkua marluk, Muammar Gaddafi Libyami qullersaalluni pisortaasoq qinnuigiartorniarpaat, bulgariamiut inuit arfinillit inuunertik tamaat parnaarussaaqqasut iparagaatissagai.
Bulgariamiut peqqinnissaqarfimmi sulisut inuit taakkua arfinillit eqqartuunneqarsimapput qanoq iliornertik ilisimagaluarlugu Libyamiut meerartaannik 400-it sinneqartunik HIV-virusianik tunillaassuisimasutut. Bulgariamillu taakkua arfinillit siunissami iperagaasinnaanerat piviusunngorsinnaavoq.
Sapaatip akunnerani kingullermi Libyami eqqartuussisuserinermut ataatsimiititaliaannit Bulgariamiut inuit taakkua arfinillit toqumut eqqartuunneqarsimanerigaluat allanngortinneqarpoq inuunitik nallugit parnaarunneqartussanngorlugit.
Taamatut pisoqarpoq meeqqat 460-it HIV-virusianik tunillatsissimasut ilaqutaat tamarmik ataasiakkaarlutik 5,4 mio. kr.-nik aningaasanik taarsiivigineqareersullu.
Taamatut ilaqutaasunik aningaasanngorlugit taarsiissuteqartoqarnerata kingunerissavaa Bulgariamiut inuunertik naallugu parnaarunneqartussanngorsimasut iperagaatinnissaannut ajornarunnaarsitsiniartussaammat.
Frankrigimi præsidentinngorniulluni qineqqusaarnermi Nicolas Sarkozyp, Bulgariamiut taakkua arfinillit parnaarussivimmiit iperagaanissaat qineqqusaarutigisimavaa.
Præsidentinngorniunnerlu iluamilluunniit naammassilluanngitsoq qangaammalli Nicolas Sarkozyp nulia Libyamukariikatappoq, Bulgariamiut iperagaatinneqarnissaannut isumaqatiginninniariartorluni.
Meerarpassuit HIV-visusianik tunillanneqarsimasut taarsiigineqarnerannut EU pingaarutilimmik suliaqartuusimavoq. Nicolas Sarkozyp pingasunngorpat allannginneranni EU annertunerusumik sunniuteqaqataaniaruni maannakkut tuaviortariaqarpoq.
