Præsident Obama issittoq pillugu ataatsimeersuarnermi oqalugiarpoq

Præsident Obamap Alaskamut ulluni pingasuni tikeraarnini aallarteqqammerpaa.
septembarip 01-at 2015 05:08
Nutserisoq Simon Uldum -

Præsident Obama Alaskami Anchoragemut ippassaq ataasinngornermi ualikkut tikippoq issittorlu pillugu ataatsimeersuarnermi Glacierimi oqalugiarluni.

Silap pissusiata allanngoriartornera oqalugiaammini kisiat sammivaa. Oqalugiaataa ilungersorpaluppoq pitsaasunilli aamma imaqarluni. Silap pissusiata allanngoriartornera navianaateqartutut isiginagu periarfissatut atorluarneqartariaqarnera aamma tikkuarpaa.   

AAMMA ATUARUK Vittus: USA-p silap pissusia pillugu isummani allanngortissimavaa

Obamap qularnissamut pissutissaqannginnerarpaa silammi pissusiata allanngoriartornera maanna malunniutereermat. Tamatumunnga arlalinnik assersuuteqarpoq, soorlu panernersuaqarnera, qarsutsinerit orpippassuillu ikuallanneri.

Avatangiisilli ernumassutigineqarnerisa nukittuumillu aningaasaqarnissamut periarfissat aporaattariaqannginnerat aamma oqaatigaa. Taakkumi ataatsimoortinneqarsinnaanerarpai.

- Siuariartornitta arriippallaarujussuartumik ingerlanera maanna ajornartorsiutigisatta annersaraat. Ajornartorsiutit sukkanerusumik paasillugillu iliuuseqarfigisinnaasariaqarpagut, præsidenti taama oqarpoq.

Aamma oqaatigaa ataatsimoorluni iliuuseqarfigineqartariaqartoq. Ilaatigullu USA-p Kinallu aamarsuarnik ikummateqarnikkut aniatitsineq pillugu suleqatigiinnerat eqqaavaa.

Aamma atuaruk WWF-ip ataatsimeersuarneq silap pissusianut tunngasoq pitsaanerarpaa

Oqalugiaatip annersaa amerikamiunut sammitinniarneqarpoq, taakkumi ilarpassuisa silap pissusiata allanngoriartornera suli upperinngilaat.

Præsident Obama Alaskami nunaqarfinnut pingasunut ulluni tulliuttuni marlunni tikeraassaaq silap pissusiata allanngoriartornerata sunniutai qanimut takusaniassallugit.