Præsident Musharaff nammineq tunuarpoq
Pakistanimi inatsisartunut februarimi qinersisoqarmalli Musharraf præsidentiuinnarsinnaassanersoq pissanngatigineqariartuinnarsimavoq. Taamani qinersisoqarmat Benazir Bhutto-p partiia, Islamisiortullu partiiat, Nawar Sharifimit, 1999-imi Musharraf-imit uppitinneqartumit siuttuuffigineqartut, taasiseqarnerpaapput. Tassalu taakkua partiit marluk naalagaaffik sinnerlugu Musharraf-ip eqqartuunneqarsinnaanissaa piariileruttoraat Musharraf tunuarpoq. Musharraf Pakistanimiunut oqalugiarnermini oqarpoq, taamatut imminerminut eqqartuussisoqaraluarpat ajugaasoqarani ataasiinnarmik ajorsartoqassasoq, tassaassasorlu Pakistan naalagaaffittut kisimi.
Tusagassiorfiit kiffaanngissuseqarluni oqarsinnaatitaanerup siornali killilersorneqalernera aallarniutigalugu Musharrafip tunuarnissaa anguniarsimavaat, tusagassiorfiullu TV-kkut Musharrafip oqalugiaataanik aallakaatitsisup aallakatitsinini maanaannaq kipiinnariarlugu inuit aqqusinerni nuannatilereersut takutippai. Peqqarniisaarnianik akiuiniarnermut 2001-imili USA-p Musharraf ikiortitut tatigisinnaasimavaa, Pakistanilli aningaasaqarniarnikkut ajornartorsiuleraluttuinnarnera Talibanillu saassussisarnerisa sakkortusiartuinnarnerat ilutigalugu Musharrafip tunuaqquneqarnera sakkortusiartuinnarsimavoq. Eqqartuussisuunerillu Musharrafimut akerliusut kattummatali tunuaqqusineq ersarissiartuinnarsimavoq. Musharrafip tunuarnerata kingorna Pakistanimi politikkikkut eqqissisoqarnissaa ilimagineqanngikkaluartoq qinigaasimasut siunertartik ataaseq, præsidentip tunuarneratigut anguaat. Maanna inatsisartut qinigaanerminnut pissutaasoq, tassalu naalaggaaffimmik aqutsinissaq, aallussinnaanngorpaat. Pakistanimili naalakkersuinikkut ingerlatsiniarneq imannaasanngeqaaq.
Musharrafip kina kingoraartigissaneraa suli ilisimaneqanngilaq.
