Præsident Jacques Chiracip isumaa allanngorpoq
Frankrigimi ilinniartut isummaminnik ersersitsiniarlutik ingerlaaqatigiippassuit, præsident Jacques Chiracip isumaanik allanngortitsipput.
Jacques Chiracip ministeriuneq de Villepin akerlilerpaa, inuusuttullu ajornannginnerusumik soraarsinneqarsinnaanerannik inatsisissaattut siunnersuut tunuartillugu.
Inuusuttut 26-t inorlugit ukiullit ajornannginnerusumik soraarsinneqartarnissaannik siunnersuut tunuartinneqarpoq. Tamaalilluni præsident Jacques Chiracip ministeriunerup siunnersuutaanik tunuartitsinera, ministeriunermut sakkortuumik kinguneqartussanngorpoq. Frankrigimi aappaagu qinersisoqareerpat, præsidentip malitsissaatut imminut taanna takorloortarpoq. Maannali tamanna ilimagisinnaajunnaarpaa.
Frankrigimili nunap iluani pissutsinut ministeri, præsidentinngornissaminut imminut aamma piukkuttoq, præsidentinngornissaminut neriuutissaqalerpoq.
Inuusuttut 26-t inorlugit ukiullit ajornannginnerusumik soraarsinneqarsinnaanerannik inatsisissatut siunnersuummut taarsiullugu, inuusuttut atugarissaannginnerusut ajornannginnerusumik suliffittaartarnissaannut suliniutit arlallit pimoorunneqarlutik aallartisarneqassapput.
