Præsident-ip naliliinermini AWG angusarissaartippaa
Issittormiut unammiuaarnerat ataqatigiissarniarlugu unammillernarsimavoq. Arctic Winter Games Internatinale Komitiip præsidentiata Jens Brinchip AWG 2016 ilutsilluartutut nalilerpaa.
Taassuma Radioaviisimut oqaluttuarara, aaqqissuussineq iluatsissimasoq, aamma silap ajornera pissutigalugu timmisartuussinerit kinguaattoorfiunerat unammillersimagaluartoq aamma nammineq piumassutsiminnik ikiuuttartussat takkutsinngitsoortaraluartut.
Tikeraat nuannaarput aamma tikeraanit tusakkagut ajunngillat, præsidenti Brinch oqarpoq.
- Illoqarfimmut tikinneq innutaasunik naapitsineq aamma sumulluunniit pigaanni inussiarnisaarfigitinneq oqaluttuariuarpaat.
Timersuutit ataasiakkaat silap qanoq innera apeqqutaalluni ajornartorsiutigineqarsimanerat Jens Brinchip eqqaavai
- Ajornartorsiortitsisimapput tamakkuali aaqqinneqarnissaat pikkoriffigineqarsimasut maluginniarpakka.
Arctic Winter Games Internationale komitiip præsidentiata Jens Brinchip piareersarsuaarsimaneq imminut akilersimasoq tikkuussissutigaa.
- Ullumikkut iluatsilluartumik ingerlasoqarneranut tunuliaqutaavoq. Piumasaqaatillu aaqqissuussat ingerlanneqarnerini piumasaqaatigisagut takusinnaalerpagut piviusunngortinneqartut pilersaarutillu malinneqartut.
Piumassutsiminnik ikiuuttut takkutinngittarneri pineqartillugit Jens Brinch-ip tikkuussissutigaa Amerika avannaani piumassutsimik ikiuuttut pineqartillugit allamik periuseqartoqartoq. Piumassutsimik ikiuunnermut tunngasuni Kalaallit
Nunaat matumani misilittagaqalerpoq.
- Piumassutsimik ikiuunneq akisussaaffimmik aamma tigusineruvoq. Tassa imaappoq, ikuukkumariarluni takkutinngitsoorneq periusissaanngilaq, Brinch oqarpoq.
Piumassutsimik ikiuuttorpassuit takkuttorpassuillu illuatungaani AWG-ip internationaalip isaanit sutigut tamatigut ajunngilluinnaqqissaartumik ingerlatsipput.
- Pisussat ingerlanneqarnerinut sunniuteqarsimanngitsoq takusinnaavarput. Meerannguit nuannaaqaat, aqutsisullu iluarisimaarinnipput, taakkuppullu pingaartitarisagut.