Professorit: Urani pillugu Kalaallit Nunaat kisimi aalajangiisinnaavoq
Ilaatigut taama allaaserisaqarpoq, aviisi Information ullumi saqqummersumi amma allaaseralugu, Naalakkersuisut Qallunaallu naalakkersisuisa akornanni isumaqatigiissummi ilaatigut uranimut tunngasumi, allassimammat uranip avammut tunisassiarineqarnerani, Nunatta nuna sorleq tuniniaaffiginerlugu, Naalakkersuisut Qallunaat naalakkersuisuinut erseqqissumik tamanna nalunaarutigisassagaat.
- Aatsitassat suulluunniit tuniniarniarutsigit, tamanna Nunatta kisimi akisussaaffigaa, Danmarki apereqqaartariaqanngilarput, Aatsitassat pillugit Naalakkersuisoq, Jens-Erik Kirkegaard, Siumut aviisimut Information-imut oqarpoq.
Qallunaat Naalakkersuisuisa Nunattalu Naalakkersuisa isumaqatigiissutaanni oqaaseqaat, 36-nik quppernilik aviisip Information-ip pissarsiarisimasani aallaavigalugu allaaserisaani ilaatigut atuarneqarsinnaavoq, isumaqatigiissut Qallunaanit malinneqanngippat, Nunatta kissaatigisinnaaga tamanna isumaqatigiinngittoqartillugu eqqartuussinikkut aalajangerneqassasoq.
Isumaqatigiinngittoqartillugu eqqartuussinermi Danmarki eqqartuussissuserisunik marlunnik toqqaassaaq taamatullu Kalaallit Nunaat taamaaliussalluni, taakku isumaqatigiinngittoqartillugu eqqartuussinermi aalajangiisinnaanngippata, pisoq eqqartuussiviit qullersaannut ingerlateqqinneqassaaq.
Isumaqatigiinngittoqartillu eqqartuussinissamik Nunatta Danmarkimut sioorasaarinera Nunatta ilumoorukkaa, Aarhusip Universitetiani naalagaaffiit innuttaasa pisussaaffii pillugit professorip, Jens Hartig Danielsenip oqaatigaa.
Isumaqatigiinngittoqartillugu eqqartuussineq ulloq manna tikillugu suli atorneqarnikuunngilaq.
Nunatta Danmarkillu akornanni aatsitassat pillugit isumaqatigiissummi oqaaseqaat radioaviisimit aamma pissarsiaraarput. Tassani atuarneqarsinnaavoq, uranimik imaluunniit qinngornernik ulorianartunik akulinnik aatsitassanik, Nunarput avammut tuniniaanissamik aalajangiippat, Qallunaat Naalakkersuisuisa Nunatsinni oqartussaasut killilersorfigisinnaanngikkaat taamaalioqqunagilluunniit.
Nunatta uranimik avammut tunisassiortunngornissaanik oqallinneq sunut tamanut sammisinneqalersoq, Sverigemi illoqarfimmi Lundimi Universitet-imi naalagaaffiit innuttaasa pisussaaffii pillugit professorip aamma Namminersortunngonitsinni inatsimmik ilusilersueqataasup, Gudmundur Alfredsson-ip oqaatigaa.
- Aatsitassanut tunngasut Kalaallit Nunaannit akisussaaffigineqalernissaat Qallunaat tungaanniit nangaassutigineqanngilluinnarlutik 2009-mi akuersissutigineqarput. Qallunaat naalakkersuisui akisussaaffimmik tunniussinertik soorluuna peqqissimissutigilersimagaat, kisianni tamanna kingusinaareerpoq, Gudmundur Alfredsson aviisimut Informationimiut oqarpoq.
