Professori: Namminersulernermi aningaasarsiorneq ajornerulissanngilaq

Namminersorneq pillugu isumaqatigiissut Kalaallit Nunaata aningaasaqarneranut ajorseriartitsinavianngilaq. Taama aningaasarsiornermut ilisimatooq aamma ministeriunerup Kalaallit Nunaata aningaasarsiorneranut siunnersuisartua Christen Sørensen isumaqarpoq.

- Kalaallit Nunaannut nuannaarutaassaaq Danmarkimit tapiissutaasartut allanngortinnagit ingerlaannassammata, taamaammat isumaqatigiissut naammaginaqaaq, Christen Sørensen aallartippoq.

Oqartussaaffiit Danmarkimit maanna tigummineqartut qaqugu Kalaallit Nunaanni oqartussanit tiguneqarnissaat kalaallit namminneq aalajangersinnaanngussammassuk pingaarnerpaasoraa.

- Kalaallit Nunaat namminivik aalajangiisinnaanngussaaq, oqartussaaffiit suut qaqugu tiguneqassanersut, immaqalu qaqugu Danmarkip ataatsimoortumik tapiissutai 0-inngussanersut. Uuliamik qalluisoqalerluni aningaasatigut iluanaaruteqartoqalissagaluarpat, Kalaallit Nunaata namminivik aalajangersinnaalissavaa qaqugu susoqassanersoq, Christen Sørensen erseqqissaavoq.

Soorunalumi eqqumaffigisassaqarnerarpaa.

- Ataatsimoortumik tapiissutit amerleqqinneqarsinnaajunnaarnissaat eqqaamasariaqarpoq. Oqartussaaffiit Kalaallit Nunaata karsiata nammineq akilertussanngussavai. Tassa aningaasarsiorneq ajornartorsiorfiuppat, taava oqartussaaffiit tiguneqarsinnaassanngillat, taamaattumik oqartussaaffiit sukkasuumik tigujartuaarneqartussatut eqqarsaatigisamit arriinnerusumik immaqa aamma tigujartuaarneqarsinnaassapput, nangippoq.

Aperaarput Kalaallit Nunaanni ingerlatsineq Namminersorneq eqqunneqarpat ajornerulissasorineraa.

- Naamik, aningaasaqarnerup ikaarsaariarneq nammassinnaavaa. Kisianni eqqaamasariaqartoq tassaavoq Danmarkimit tapiissutaasartut allanngortinnavianngimmata, Namminersorneq eqqunneqarpat qaffanneqarsinnaassannginnamik. Tassa kalaallit piumagunik oqartussaaffinnik tiguseqqittariaqassanngillat, politikerit aningaasaqarneq apeqqutaatillugu namminneq aalajangiiumaarmata, Christen Sørensen naggasiivoq.