Professori: Kalaallit Nunaat namminersulivissaguni nukittuunik suleqateqartariaqassaaq
Naalagaaffiit pissusiinik ilisimatusarsimasoq, Oslollu Universitetiani professori Øyvind Østerud, Atlantikup avannaani Issittumilu siunissami politikkissaq pillugu Ilisimatusarfimmi ulluni pingasuni, apriilip 29-aniit maajip ulluisa aappaata tungaanut isummersoqatigiinnermi kingullertut oqalugiarami taama oqarpoq.
- Kalaallit Nunaata nukittuumik suleqateqarnissani pisariaqartilluinnarpaa. Danmark massakkut isumalluutaasorujussuuvoq. Danmark politikkikkut aningaasatigullu tapiisarnermigut Kalaallit Nunaanninngaanniit tunuariartulissappat, taava siunissami politikki eqqarsaatigalugu isumaqarpunga Kalaallit Nunaata politikkikkut aningaasarsiornikkullu siunissani pillugu kimmut saakkiartuaassasoq, Canada USA-lu suleqatiginerulissallugit, Øyvind Østerud oqarpoq.
Kalaallit Nunaat namminersulivittunngorsimanerminut atatillugu pinngitsoorani suut naammassisassarinerai, Øyvind Østerud aperaarput, imalu akivoq:
- Aatsitassarsiorneq uuliasiornerlu annertusineqassappat, nakkutilliisinnaanissamik pisariaqartitsisoqassaaq, Imartaq nakkutilliivigineqarsinnaasariaqassaaq, annaassiniarnermilu ikiuussinnaasoqartariaqassalluni, professori oqarpoq.
Kalaallit Nunaat ataatsimoortunik tapiissutinik Danmarkimit maanna pisarpoq, namminersulivittutulli inissikkuni tamanna soorunami isumalluutaajunnaassalluni, taava assersuutigalugu USA isumalluutaanerulersinnaassanerpa, aperaarput:
- USA-p pisuussutinut Kalaallit Nunaanniittunut atuisinnaatitaalernissaanut taava taarsiutaasariaqassaaq. Ataqatigiinnermut aaqqissuussinerit atortulersuutillu matumani pivakka. USA tamakku piorsaavigisinnaavai, pisussutinillu atuisinnaatitaajumasinnaassalluni, Øyvind Østerud oqarpoq.
USA-p Nunatsinnik massakkut soqutiginninnera killeqartoq, taanna isumaqarpoq, assersuutigalugu Canadap avataanut Nunatsinnullu, Issittorlu ataatsimut isigalugu. Soqutiginninnerli alliartornerarpaa.
Danmarkip Issittoq pillugu soqutiginninnera siunissami qanoq isikkoqassanersoq Øyvind Østerud aamma aperaarput, akivorlu:
- Kalaallit Nunaanni politikkikkut pissutsinut Danmarkip akuliuttarnera ukiuni qulikkaani kingullerni annikilliartorusaarpoq, annikilliartuinnavissagunarlunilu. Taamaalippallu Kalaallit Nunaata Issittumi inissisimanerata sunniutikinnerulernissaa ilimagaara, naalagaaffiit pissusiinik ilisimatusarsimasoq, professori Øyvind Østerud naggasiilluni oqarpoq.
