Professori: Kalaallit Nunaat maligassiuivoq
- Aallaqqaammut siunnersuutigineqartumut naleqqiullugu siumut alloriarneruvoq, Henning Jørgensen, sulisut atugaannut tunngasunik immikkut ilisimatusarsimasoq, Aalborg Universitetimeersoq, oqarpoq.
Suliniutini angisuuni illuliortiternernik sanaartornernillu suliassat pillugit inatsisip allanngortinneqarnissaanut Naalakkersuisoqatigiit siunnersuutaat sulinermik inuussutissarsiuteqartunut nutaarsiassatsialaasoq, Henning Jørgensenip oqaatigaa.
Suliniutinut angisuunut inatsisip allanngortinneqarnissaanut siunnersuut, Inuussutissarsiornermut naalakkersuisup Jens-Erik Kirkegaardip sapaatip-akunnerata siuliani tunniuppaa, siunnersuullu Inatsisartut ukiaanerani ataatsimiinnissaanni sapaatip-akunnerit pingasut missaanni qaangiuppata oqallisigineqartussaalluni.
Sulisut illersorneqarnissaannut suliffeqarfissuup taassumunngalu sullissisut akisussaaffeqarnissaat inatsimmi pineqartumi pingaartinneqarluinnarpoq, soorlu aamma nunani allani tamanna pingaartinneqartoq, Henning Jørgensen oqarpoq:
- Sulisut illersorneqarnissaannut suliffeqarfissuup taassumunngalu sullissisut akisussaaffeqarnerannut atatillugu Kalaallit Nunaat maligassiuisuuvoq, akisussaaffillu taassuma inatsimmut ilaatinneqarnera pissutigalugu aningaasaleerusuttut tunuarsimaalersinnaanissaannut aarlerisoqartariaqarani. Sulisunummi akissarsiatigut atukkatigullu apparsaasoqannginnissaa suliniutinut angisuunut inatsimmi allassimavoq, Henning Jørgensen oqarpoq.
Sulisunut akissarsiatigut atukkatigullu apparsaasoqannginnissaa pillugu Europami maanna oqallittoqartorujussuuvoq, suliffeqarfissuillu matumani akisussaaffeqarnissaat Naalakkersuisoqatigiit allannguutissatut siunnersuutaanni ilaatinneqarpoq.
Allannguutissatulli siunnersuut professorip nersualaaginnanngilaa, sulisummi atugassaasa ilaat, assersuutigalugu angerlarnissaannut tunngatillugu aningaasartuutit sulisitsisut nammattariaqassanngilaat, soorlu aamma nerisaqartitsinikkut inissaqartitsiniarnikkullu atukkat pillugit malittarisassat sukannerpallaaratik.
Sulisoqarnikkut pissutsit nakkutilliinerillu allannguutissatut siunnersuummi sukumiinerusumik ilaatinneqannginnerat, Henning Jørgensenip eqqarsarnartoqartippaa:
- Sulisoqarnikkut pissutsit assigiinngitsut pillugit malitseqartinneqarnissaat pillugu allannguutissatut siunnersuummi sukumiinerusumik ilaatinneqanngillat, assersuutigalugu unioqqutitsisoqarsimatillugu qanoq iliortoqartassanersoq sukumiinerusumik ilaatinneqanngillat, sulisut atugaannut tunngasunik immikkut ilisimatusarsimasoq, professori Henning Jørgensen, Aalborg Universitetimeersoq, oqarpoq.
