Prodi: Irakimi sakkutuuliineq kukkuneruvoq

Italiap naalakkersuisuisa siulittaasortaavata, Romano Prodip, inatsisartuni siunnersuutigilersaarpaa Irakimi sakkutuuliussamik 3.000-iusut, iligisatik isumasioriarlugit, angerlakaatinnissaat.

Prodip naalakkersuisortaavisa, sapaatip-akunnerani uani siusinnerusukkut ivertinneqartut, ilimasaarutigereerpaat, naalakkersuisunngorniariarlutik sakkutuutik angerlartinniarlugit.

Danskit inatsisartuisa sakkutuuliussamik sivisunerusumik Irakimiissinnaanerat ullumikkut aamma oqallisigisussaavaat.

Danmarkimi naalakkersuisut, Dansk Folkeparti ikorfartortigalugu, apeqqummut amerlanerussuteqarput. Ilimagineqarporlu danskit sakkutuut Irakimiinnerat ukiumik ataatsimik sivitsorneqassasoq.

Romano Prodip Italiap Irakimi sakkutuuliisimanera kukkunerunerarpaa. Talerperliillu siunnersuummut isumaqataanngilluinnarput.

Sakkutuumik qaqugu angerlartinnissaat ullulinngikkaluarlugu Prodip kissaatigaa periarfissaq siulleq atorlugu angerlakaatinneqarnissaat.

Nunat arlallit Irakimi sakkutuuliineq isumaqatigiunnaarlugu peqataajunnaarput, allallu taamaaliorniarlutik pilersaarput.