Prodi ajugaavoq
Romano Prodip partiia taakkunanngalu tapersersuisut inatsisartuni inissat amerlanerussuteqarfigalugit qulakkeereerpaat taamaalillutillu Italiami premierministeriusimasoq Silvio Berlusconi pisortatigoortumik ajugaaffigaat. Silvio Berlusconilli, ajorsartuusup, qinersinermi taasinerit atorsinnaanngitsutut taaneqartut millionit affaannik amerlassusillit kiseqqissaarneqarnissaat piumasaqarpoq.
Qinersinermi taasinerit kisinneqarneri pillugit Rom-imi Amerikamiut universitetianni nunat tamat naalakkersuinermik suliaqartut pillugit immikkut ilisimasalik Bjørn Thomasen ima oqaluttuarpoq:
- Qinersineq pissanganartorujussuuvoq ilimagineqarsimanngilarlu saamerliit ajugaanissaat. Berlusconi qinersinermi ajorsartuugaluarluni siuariarsimasutut taaneqarsinnaavoq. Qaammatip ataatsip matuma siorna isumasuinerit naapertorlugit taasinerit pingajoraarterutaat angullugu annaassagai ilimagineqarsimagaluarpoq. Massakkulli qinersinermi taaneqarnerusimavoq. Berlusconip tunuarniuteqarsinnaanera aamma siornatigut eqqartorneqarnikuuvoq – massakkullu qinersisoqareernerani paasinarsivoq illuatungiliuttutut ataannarsinnaalersoq. Prodi naalakkersuisuutitaasalu ajalusoornissaat utaqqissagaa ilimagineruara, Bjørn Thomasen oqaluttuarpoq.
