Upernavimmiit avannamut attaveqaatit kipisaqattaarsinnaapput

Qaammataasanut attaviit TELE-POST-ip sukkanerpaamik allanngortiterpai, sullissinernili aqqutit sukkassutsillu arriillisimaarallassapput.

Radiokædip aaqqissuunneqarnerani qaammataasanut attavinni backupitut sillimmatit atorneqarsinnaasut annikittuinnaapput, tamannalu peqqutaavoq killilersuigallalernermut. Attaviugallartuni aqqutit killeqartut oqaloqatigiinninnernut atorneqarnissaat aamma inuiaqatigiinnut pingaaruteqarluinnartunut sullissinernut, assersuutigalugu sinerissami radiunut, atorneqarnissaat qulakkeerniarneqarpoq.

- Sapinngisarput tamaat iliuuseqarpugut Upernavimmiit avannamut attaveqaqqilernissaa anguniarlugu, akornusersuisoqarneralu sullitatsinnut ajuusaarutigisorujussuuarput. Attaviit tamarmik atorteqqilernissaannut sulisuvut pikkorissut ulappupput, neriuppugullu silap akornusersussanngikkaatigut, TELE-POST-imi Teknikkinut aamma IT-nut pisortaq Jonas Hasselriis oqarpoq.

Attaveqaatit ajoquteqarnerinut suna peqqutaanersoq TELE-POST-ip maanna misissuiffigaa,  suut peqqutaasut paasineqarpata aamma aaqqinniarnissaat qanoq sivisutigiumaarnersoq ilimanarsippat, nittartakkakkut tamakku ataavartumik nalunaarutigineqartarumaarput.