Prins Joachim asannittoq
Prins Joachim-ip arnaatitaava kinaanersoq tamanut ilisimatitsissutigineqarpoq. Franskiuvoq 30-inillu ukioqarluni. Marie Cavallier-imik ateqarpoq, Genéve-milu najugaqarluni, Danmarkilugooq nuannarisorujussuugaa, Billed Bladet allappoq.
Oqaluttuarisaanermik ilisimatooq kunngikkormiunillu ilisimasaqarluartoq, Steffen Heiberg isumaqarpoq, arnap taassuma Billed Bladet-mit apersorneqarnissaanut kunngikkormiut akuersisimassasut. Prins Joachim-ip arnaatitaani apersorneqarnissaanik akuersisimaguni aappariinnerat ilumoortuusimassasoq, qanittunnguakkullu aappariinnerat pisortatigoortumik saqqummiunneqarumaartoq, Ekstrabladet aamma allappoq.
Prins Joachim Marie Cavallier-lu ukiut marluk ilisarisimasariissimapput. Arnaatitaava Parisimi peroriartorsimavoq, tassanilu aamma ineqarpoq. USA-mi ilinniartuunikuuvoq, New Yorkimilu qarasaasialerisuni atorfeqarnikuuvoq, ataatassami suliffeqarfiutaani Genéve-miittuni qarasaasialerinermut tunngasunik suliaqartuni atorfeqalernissami tungaanut.
Prinsi sapaatip-akunnerata tulliani Nuummut tikissaaq, aningaasaateqarfiup Den Kgl. Grønlandsfondip siulersuisuisa ataatsimiinnissaannut, siulittaasuuffigisaminullu peqataajartorluni. Siulittaasuuffik aanagigaluani Dronning Ingrid kingoraarlugu atorfigilernikuusaa.
