Prins Henriup ilisaanera ima pissaaq
Ilisineq TV2-p aallakaatitaa nunatta nalunaaqutaa malillugu ullaaq nal. tallimanit KNR2-kkut toqqaannartumik aallakaatinneqalerpoq.
Naalagiaqatigiinnermi inuit 60-it peqataapput, kunngikkormiut, prins Henriullu ilaqutai, inuillu pisortaneersut ataasiakkaat peqataapput, naalagiussinerlu minutsini 45-ni sivisussuseqassaaq.
Oqaluffimmi nalliuttorsiorpaluttumik naalagiussineq naggaserlugu prins Henriup illerfia issumeerneqassaaq, tamannalu pereerpat illerfia biilimukaanneqassaaq, ilaqutaasullu ingerlaqatigiillutik malinnaassapput.
Danmarkimi siarngit tamarmik ilisinissamut minutsit 30-t sioqqullugit sianertinneqassapput ilisereernermilu aamma minutsit 30-t ingerlanerani siarngit sianertinneqassallutik.
Tamanna pereerpat immikkut peqataasussat najuuffigisaannik katerittoqassaaq, kikkut peqataassanersut ilisimatitsissutigineqanngilaq, statsministerili Lars Løkke Rasmussen aamma Folketingimi siulittaasoq, Pia Kjærsgaard peqataassamaarput.
Prins Henriup nammineerluni kissaatigisimavaa arsami affai Danmarkip imartaanut siaruaanneqassasut sinnerilu naatiivissuarmiitinneqassasut.