Prins Henrik traktorerpoq

Kunngikkormiut Kujataaniinnerminni tikeraagaasa ilagaat UpernaviarsuK. Nunalerineq tassani takusaqarfigilluarpaat. Naatitanik nutsuipput, ooqattaaralutik traktorimillu angalaarlutik - eqqornerusumilluunniit oqaatigalugu: kunngikkormiutut ataqqinassusilik Prins Henrik traktorip nivaataasarsuanut ikilluni angalaarpoq.
Allattoq Carla Davidsen
juulip 22-at 2011 05:24

Dronningip uia 77-inik ukiulik pitsorluttuuvoq, naatitanillu misileraavik qattunermiimmat, nunaqarfinnguamilu nalinginnaasumik biileqanngimmat, Prins Henrik traktorip, John Deere-iusup, nivaataanut ikivoq, taannalu kareteralugu. Nissuni aalataartinnguarlugit qattorngup qaava anguvaa, naatsiivilerisumit norgemiumit, Anders Iversenimit. tikilluaqquneqarluni.

Naatsiianik, salaatinik allarpassuarnillu naatitsisarnertik Anders Iversenip nalunaaquttap akunnerata ataatsip missaani oqaluttuaraa. Suliaalu Kunngikkormiunit soqutigineqarluarput, apeqqarissaaqaallu.

Naatitallumi Dronning Margrethep Prins Henriullu aamma ooqattaarpaat, soorlu salaatit assigiinngitsut.

Prins Henrik, naluneqanngitsutut nerisassanik nuannarisaqarluartusoq, nerineqarsinnaasunik Kunngikkormiut umiarsuaannut Dannebrogimut aamma nassarpoq. Qattunermiimmi ammut uternerminni Prins Henrik traktorip nivaataaniit pisseriataarpoq, aqqusiniaarannguullu sinaani nutsuilerluni, naasummi assigiinngitsut takugamigit angerlaassassaminik naammatilluni nutsuivoq.

Nanortalimmiut ullumikkut Kunngikkusiussapput. 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq