Prins Henrik kunnginngorsinnaavoq
Tassami aviisimi Berlingske Tidendemi allaaserisaq najoqqutaralugu Folketingimi amerlanerussutillit prinsip taaguutaata allanngortinnissaa ammaffigaat.
Prins Henriup arlaleriarluni oqaatigisarpaa, Dronning Margrethep uia kunngimik taaneqartariaqartoq. Taamaattorli Danmarkimi partit Venstret aamma Dansk Folkepartip prinsip kissaataa akuersaalersaanngilaat.
- Kunngikkormiut ajunngitsumik inissisimapput. Qanoq iliuuseqarfigeqattaarutsigik, aamma qanoq taaguuteqarnerinut tunngasut allanngortitilerutsigik, Danmarkimi kunngikkormioqarneq qimakkiartulissavarput. Prins Henrillu ima oqarfigisariaqarparput: Taama oqalunnerit unitsinniaruk, tamanna peqataaffigerusunngilarput, Søren Espersen, Dansk Folkepartimeersoq aviisimut Politikenimut oqarpoq.