Tunissut naalakkersuisunut siulittaasuugallartumit Hans Enoksenimit pilluaqqussummik ilaqartinneqarpoq, pilluaqqussutillu saniatigut Dronningip Prinsillu juunip ulluisa 21-anni tikeraarnissaannut qilanaarnini ilaqartippaa.
Prins Henriup taalliaminik ”Blå mærker på sjælen”-imik atsikkaminik saqqummersitsinera pillugu Enoksenip aamma pilluaqquaa. Saqqummersitaq taallanik 40-nik imaqarpoq - marluk kalaallisuunngortitat - immikkut Nunatsinnit isumassarsiffigisimasai ilaallutik - taalliallu juunip ulluisa 20-anni saqqummersinneqassapput.
Fredensborgimi Sjællandip avannaaniittumi ullumi katerisimaarnermi Prins Henrik qitiuvoq. Nalliuttorsiorneq ippassarli aallartippoq, tassa tassani Prins Henrik meeqqaminnut, ukussaminut ukuarisimasaminullu, ikinngutiminut nuimasunullu inuuissiornermut atatillugu Danmarkip Radioata illorsuani tusarnaartitsimmat.