Prins Harry nulialu ernertaartut
Tuluit Nunaanni prinsip Harryp nulia 37-nik ukiulik Meghan ataasinngormat ernivoq.
Aappariit Instagramimi pisortatigoortumik quppernerminni taama nalunaaruteqarput.
Prinsip nuliata Meghanip ernisunnera tuluit tusagassiorfiisa arlallit allaasereriitsiaraallu ataasinngornermi ualisoq tamanut taama nalunaaruteqarput.
Ataasinngormat ullaakkut inunngortoq, ataatanngortoq prins Harry oqarpoq.
- Nuannaarutigalugu Meghanilu ullaaralaaq ernertaarnerput nalunaarutigissavara. Nukappiaraq peqqippoq. Anaananngortoq meerarlu ajunngillat. Aatsaat taama nuannertigisumik misigisaqarpunga, prinsi oqarpoq.
- Nuliara tulluusimaarutigeqaara, aamma ataatatut angajoqqaatullu allatulli oqaannassaanga meerartaarput nallernissaqanngilaq, prins Harry taama oqarpoq.
Nukappiaraq 3260 gramminik oqimaassuseqarpoq, angajoqqaanngortut Instragrammikkut taama ilisimatitsipput.
Ataatanngortup 34-nik ukiullip aamma oqaatigaa ernertik qanoq ateqalissanersoq suli aalajangersimanngikkitsik. Aappariit aatsaat meerartaarput, Tuluillu Nunaanni kunngikkormiuni kingornussisussat tulleriiaarnerini normu 7-iulluni.
Prins Harryp amerikamiu filmiliaritittartoq Meghan Markle ukiup aappaa avillugu aapparereerlugu 2017-imi nuliarsarfigaa. Siorna maajimi katipput.
/ritzau/Reuters
