Prammi assartuut Paakitsumi kivisoq
Nunamut assartuinermi prammi atorneqartartoq Viking II nunamut qaqinneqarsimavoq iluarsaanneqassalluni. Angallat taanna aqua nunamut qaqitillugu inissinneqarsimaluarpoq sulilu nassuiaatissarsineqanngitsumik maanna kivisimavoq.
Allattoq Noah Mølgaard
juunip 19-at 2012 07:45
Angallat imaanut sisoorami puttanermut atortui imermik imaqarput taannalu pissutigalugu erngerluni kivivoq. Sissamut ungasinngitsumiippoq angallallu dieselimik 800 literimik tankiminiittoqarmat maqisoornissamut assersuusinik kaajallaallugu atortulerneqarsimavoq.
- Prammi nunamut amusimavarput iluarsaanniarlugu. Aquali imaanut sammigami sisoorluni imaanut avalaqqissimavoq, Nukissiorfinni allaffeqarfimmi pisortaq Ole Aggo Markussen oqarpoq.
Nukissiorfiit nalunaarput ullumi ullup ingerlanerani angallat nunamut qaqeriarniarneqartoq iluarsaannissaa naammassiniassammat aammalu mingutitsisoqarsinnaanera pinngitsoorneqarniassammat.
