Praktikkerfissat pillugit siunnersuut ingerlaqqippoq

Praktikkerfissaaleqisarnerup, ilinniarfinnut isinngitsoortarnermut patsisaajunnaarnissaa qulakkeerniarlugu, Naalakkersuisut iliuuseqarnissamut peqquneqarnissaannik, Inatsisartuni ilaasortap Siumumeersup, Ruth Heilmannip, siunnersuutaa, Inatsisartuni ullumi oqaillissutaangaatsiarpoq. Naalakkersuisut, Inatsisartunilu ilaasortat aaffangajassui, siunnersuummut tapersiinngikkaluartut, taamaattoq aappassaaneerneqartigani ataatsimiititalimut ingerlaqqippoq. Ruth Heilmannip siunnersuutaanut tapersiinnginnertik Naalakkersuisuni ilaasortap, Sivert K. Heilmannip, ima tunngavilersorpaa:

- Praktikkertartut amerlanerulernissaat sulissutigissagipput, Inatsisartunit siorna 2006-imi suliakkerneqarpugut. Tassa suliaq aallartereernikuuvoq. Taamaattumik, maluginiarpara, akissuteqarnitsinni oqallinnermilu siunnersuummut ilaanngilluinnartunik taputartuussisoqartoq. Kisianni suliassaq peqqissaarullugu suliassaavoq, aamma piumasaqarsinnaanngilagut malitsinneqarsinnaanngitsunik, taannalu itigartitsinitsinissamik inassuteqarnitsinnut ilaatigut tunngaviuvoq.

Sivert K. Heilmannip ataatsimiititaliamut ingerlatitseqqiinissamut amerlanerussuteqartoqarnera taamaattoq ataqqivaa.

- Naalakkersuisutut pisussaaffigiinnassavara ataatsimiitaliami paaserusunneqartut nassuiaateqarfigissallugit.

Ilinniartut tamarmik praktikkerfissaqalernissaat Siverth K. Heilmannip ersarissumik ullulersinnaanngilaa.

- Taanna oqaatigiuminaappoq, isumaqarpunga misissuinerit oqaloqatigiinnerillu peqqaartariaqartut. 100 procentimillu angusinnaassagaluarutsigu qanormita nuannertigissagaluarpa, kisiannili massakkut taamatut ikkallartillugu angusinnaagunanngilarput, pilersaarusioqatigiilluartariaqarpugulli.

Siunnersuutimi ataatsimiititaliamut ingerlaqqinnera Ruth Heilmannip naammagisimaarpaa:

- Pissusissamisoorpoq, nuannaarutigeqaaralu ataatsimiitaliamut ingerlatinneqarnera. Suliassap pingaaruteqartup pitsaasumik suliarineqarnissaanut isumaqarpunga tamatta pisussaaffeqartugut. Taamaattumik neriuppunga ataatsimiititaliami paaseqatigiittumik ingerlasoqarumaartoq.

Ruth Heilmannip erseqqissaatigaa siunnersuutimini oqaaseq ”pisussaaffiliinissaq” pinngitsaaliinertut paasineqassanngitsoq.

- Piumasaaqateqarnissamik isuma oqaatigaara, tassani sulisitsisut, ilinniarfeqarfiit pisortaqarfiillu aamma paaseqatigiillutik suliassamik ingerlatsinissaat kissaataammat, amerlanerpaartaasa praktikkertalernissaat anguneqartariaqarmat.