Praktikkerfissat amigaatigineqartuaannarput
Sanaartornermik ilinniarfimmi Sisimiuniittumi, siorna ilinniagaqarnissamut akuerisaasut 200-it missaanniissimapput, taakkunanngalu taamaallaat 61-it missaat praktikkerfissarsisimallutik. Sinneri praktikkerfissarsinngitsoortut qanoq pisimanersut ilisimanngikkitsik Sanaartornermik ilinniarfiup pisortaa Jokum Møller oqarpoq. Ilinniartut praktikkerfissaaleqisarnerat misilittagaqarluarfiginerarpaa:
- Ukiuni kingullerni malunnarsiartuinnarpoq, sionatigullu misigereerparput, ukiunilu kingullerni annertusiartorluni.
Jokum Møller oqarpoq, sanaartornermik ilinniarfimmut siorna 2006-imi 320-it qinnuteqarsimasut, taakkunanngalu 200-it missaat ilinniagaqalernissamut akuerisaasimasut. Ilinniartunngortunit 61-iinnaat praktikkerfissarsisimasut oqaatigaa. Tassa imaappoq praktikkerfissarsisut ilinniartut pingajorarterutaat inorsimavaat. Praktikkerfissarsinngitsoortut ilaasa ilinniagassamik aappaattut qinigartik aallartissimavaat sinnerili qanoq pisimanersut ilisimanngikkitsik, Jokum Møller oqarpoq.
Parkitikkerfissaaleqisarneq ukiut tamaasa ajornartoriutaasartoq Jokum Møller oqarpoq. 1990-kkut ingerlaneranni sanaartornerup unikaallarujussuarnerata nalaani sanaartornermut ilinniagaqalersut praktikkerfissarsisartullu taamani amerlanerusarsimapput, tamatiguunerusoq ukiumut 80-it missaat praktikkerfissarsisarsimallutik.
- taamaattumik tupinnalaarpoq takullugu 2006-imi taama sanaartorneq annertutigisoq ilinniartut ikiliartuinnarmata, ilinniarsimasunik amigaateqarneq takussaagaluttuinnaraluartoq. Taamaattumik arlaatigut iliortoqartariaqarpoq tamanna isigiinnarneqarsinnaanngimmat.
Jokum Møller isumaqarpoq kommunet imaluunniit Namminersornerullutik Oqartussat ilinniartoqartarneq eqqarsaatigalugu sakkortunerusumik piumasaqaateqartariaqartut.
- ilinniarneq pingaartinneqaraluttuinnartoq Namminersornerullutik Oqartussat kommunellu soqutigisariaqarpaat innuttamik ilinniagaqarluarsimanissaat. Tassami aamma kikkulluunniit akuerisinnaanngilaat praktikkerfissaaleqisorpassuit qaavatigut tikisitsiinnartarneq.
Sanaartornermik ilinniarfiup nammineerluni aaqqissugaanik praktikkertitsisalernissaq pilersaarutaasoq, Jokum Møller oqarpoq.
Ilinniartut praktikkerfissarsinngitsoortut ilinniarfiup aaqqissugaanik sinerissami aappaagu 2008-imiit praktikkertinneqartalernissaat pilersaarusiorlugu maanna aallartinniammisaalereersoq, taamalu aaqqissuussinissami ilinniartut 30-niit 40-t tungaannoortut suliffeqarfinni praktikkertinneqarsinnaanissaat eqqarsaataasoq.
