Praktikkerfissarsinissaq ajornartorsiutaavoq

Sisimiuni Sanaartornermi Ilinniarfimmut inuusuttut ilinnialerumallutik qinnuteqarsimasut 320-t missanniipput taakkunanngalu 180-it akuerineqarsimallutik.

- 180-it akornanni taamaallaat 65-it ilinniarnerminni praktikkerfissarsisimanerat ajornartorsiutaavoq, aappaagu suli kipiluttunarsinerussaaq, ilimagigatsigu qinnuteqartussat marloriaatinngorlutik 600-t missaaniinnissaat, taama oqarpoq Jokum Møller, ilinniarfiup pisortaa.

Holdi ataaseq sanasunngorniat qulit - aqqaneq-marluk ukiuni arlaqalersuni Sanaartornermi Ilinniarfimmi praktikkertarput.

-Tassaapput praktikkerfissamik nassaarsinnaanngitsut. Aappaaguminngaanniit periarfissaq taannaa sinerissamut siammarniarparput, inunnut katillugit 36-nut, tassa avannaatungitsinni, qeqqani kujataanilu periarfissaqartoqalissaq, taama nassuiaavoq Jokum Møller.

Appaagumiit Alluitsoq aserfallatsaalineqarujussuarluni aallartinneqarpat Sanaartornermi Ilinniarfimmi ilinniartut praktikkerfissatut atulissavaat.

-Tassa taanna ukiuni pingasuni ingerlanneqassaaq. Taanna uagut ingerlatarinngilarput, kisianni uagut aamma suleqataarusuppugut praktikkertutsinnut piukkunnartorujussuussagami, taama aamma oqarpoq Jokum Møller.

Danmarkimi ilinniarfiit suleqatigalugit praktikkertitsisoqartalissaaq, tassalu qallunaavaqqat Alluitsumut praktikkeriartortalersinnaalissapput.

Meeqqat atuarfiinit qimaguttussat marloriaatinngorpata Sanaartornermut Ilinniarfimmut qinnuteqartartut amerlinissaat ilimagineqarluni, taava ilinniarfiup aamma allilernissaa pilersaarutaavoq.

-Neriuutigigaluaratsigu aappaagu aggustusimi atulernissaa, kisianni ajoraluartumik kinguarpoq ukiup 2008-p naanerani 2009-llu aallartinneranut, taama naggasiivoq Jokum Møller, Sanaartornermi Ilinniarfiup pisortaa.

Meeqqat atuarfiinit, Piareersarfinnit atuartullu misilitsittussat 1000-t missaat ukioq manna meeqqat atuarfiinik qimatsipput naatsorsuutigineqarporlu aappaagu 1800-t 1850-illu akornanniissasut.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat