Praktikkerfissaqalersitsissagussi appaaffigissavassi

Ingerlatseqatigiiffiit akileraarutaat appartinneqartussanngorpoq, aningaasaqarnermullu inatsit taamaatsillugu aamma ingerlatseqatigiit pilliuteqartariaqarput praktikkerfissanik amerlanernik pilersitsillutik.

Taama isumaqarpoq ilinniartitaaneq pillugu IA-p oqaaseqartittagaa Juliane Henningsen.

- Aningaasanut inatsimmi siunnersuummi akileraarutitigut oqilisaassineq pineqalertillugu tassungalu akuerseqataassagutta IA-miit piumasarerusupparput ingerlatseqatigiiffiit praktikkerfissaaleqinermut suleqataanerusariaqartut, Juliane Henningsen oqarpoq.

Taanna aperaarput tusagassiutinut nalunaarummini siorasaaraluni allassimammat sooq siorasaarinani iliuuseqaannarsimannginnersoq.

- Iliuuserisarput unaavoq piumasaqaateqarluta; suliffeqarfiit suleqataaneruleqquagut, aamma praktikkerfissaaleqineq taama nunatsinni ajornartorsiutaatigitillugu qanoq iliuuseqartoqartariaqalermat taamatut IA-miit qisuariaateqarpugut. Akileraarutinik appaaneq siullermeerneqarnerani itigartinnikuuarput kisianni akuerseqataaffigissagutsigu piumasaqaateqarpugut tassalu; ilinniartitaanikkut iluaqutissanik iliuuseqarneq taanna nassataqartariaqartoq, oqarpoq.

Aperaarput ukiuni arlaqalersuni praktikkerfissaaleqisarneq suaartaatigineqartareermat, uukapaatitsinerussannginnersoq ingerlatseqatigiit kajumissutsiminnik tamatuminnga pilersitseqquneqarnerat?

- Kajumissutsiminnik pilersitseqquneqareernikuugaluarput qangarsuarli kisianni takusinnaavarput taanna iluaqutaasimanngitsoq, maannakkut oqarpugut ullumikkut 35 procentimik akileraartarnermut taarsiullugu 30 procentimik appassappata taava piumasaqaammik nassataqartariaqartoq, oqarpoq.

Aperaarput inatsisissaq pineqartoq qanoq issanersoq?

- IA-miit aningaasanut inatsimmut suliniarnitsinni ilanngullugu suliarilerparput. Taamaallaallu piumasaqaaterput taanna ersarittuuvoq ilinniartitaanikkut iliuuseqarnermik kinguneqartariaqartoq, taama oqarpoq Inuit Ataqatigiit ilinniartitaaneq pillugu oqaaseqartartuat Inatsisartuni ilaasortaq Juliane Henningsen.