Praktikkerfissanut aningaalissutit marloriaataat pisariaqaraluarput
Tasiilami avinngarusimasunilu allani suliffinnik sungiusarfissaaleqineq aaqqiiviginiarlugu suliffissaqarnikkut ilinniartitaanikkullu iliuusissanik sunik Naalakkersuisut eqqarsaatersuuteqarpat?
Inatsisartuni ilaasortaq Akitsinnguaq Olsen Inuit ataqatigiit, Naalakkersuisunut ilaatigut taamak apeqquteqaateqarpoq.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoq Mimi Karlsen allakkatigut akissuteqarnermini allappoq, 2008-mi atuarunnaartut marloriaataanerannut atatillugu suliffinnik sungiusarfissanik amerlanerusunik pisariaqartitsisoqarmat ukioq manna 7.mio kruunit, aappaagulu 13.mio kruunit aningaasanut inatsimmi immikkoortinneqarsimasut.
-Killeqanngitsumik nunatta karsia imaqartuuppat miinerpaamik marloriaataat naammagisimaarnarnerussagaluarput. Kisianni piviusumik eqqartuisariaqarpugut. Pingaarnersiuisariaqarpugut, Naalakkersuisut tamanna tunaartaraat, Inatsisartuni aamma taamaappoq, Akitsinnguaq Olsen oqarpoq.
Nunarsuarmi aningaasarliortoqarnera pissutaalluni aningaasaliissutit nunatsinni aamma killeqarnerat paasisinnaalluarlugu, Inatsisartuni ilaasortaq Akitsungnuaq Olsen (Inuit ataqatigiit) ilanngullugu oqarpoq. Nuummi, Sisimiuni Ilulissanilu ukiuni tulliuttuni pingasuni ilinniartunut inissialiornissanut 44,2 millioner kruunit aningaasaliissutaasimapput.
Taamaaliornikkut illoqarfinni allaneersut illoqarfinni taakkunani sungiusaatigalugu sulinerminni inissaqarnissaat periarfissaqalissasoq, Naalakkersuisut akissuteqaramik aamma allapput.