Praktikkerfissanik ujartuivoq

Allattoq Mads Lynge
marsip 23-at 2007 07:43

Inatsisartut ullumi tallimanngornermi marsip ulluisa 23-ianni ataatsimiilerunik, ilinniartut praktikkerfissaaleqisarnerannut tunngasumik oqaluuserisaqassapput.

- Praktikkerfissaaleqineq patsisaajunnaartariaqarpoq ilinniarfinnut isinngitsoortarnermut, tamanna qulakkeerniarlugu Naalakkersuisut allatut iliuuseqarnissaminnut peqquneqarnissaat siunnersuutigaara.

Inatsisartuni ilaasortap, Siumumeersup,

Ruth Heilmannip, siunnersuutini taama tunngavilersorpaa.

Ruth Heilmannip ilanngullugu siunnersuutigaa, suliffeqarfiit tamarmik praktikkertunik tigummisaqartarnissaminnut pisussaaffeqalernissaat, anguniarlugu Naalakkersuisut aaqqissuussissasut, aammalu suliariumannittussarsiuussisarneq pillugu inatsimmi sanaartugassanik iluarsagassanillu suliassaqarnermi ilinniartuuteqartarnissap piumasaqaataalernissaa eqqunneqassasoq.

- Praktikkerfissaaleqineq peqqutaalluni ilinniarnissaminnut isinngitsoortartut amerlavallaarnerat ajornartorsiutigaarput, ukiorlu kingulleq 3-400 missaaniipput.

Ukioq kingulleq apeqquteqaat aallaavigalugu ilinniarfissaaleqineq suliffissaaleqinerlu Inatsisartuni oqallisigineqarpoq, praktikkerfissaaleqinermillu ajornartorsiutit ilanngullugit ersarissumik qulaajarneqartunut ilaasut, Ruth Heilmann erseqqissaateqarpoq.