Praktikkerfissallit amerliartoqqilerput

Tusatsiarneqartartutut suliffinnik sungiusarfissanik amigaateqarneq taama ingasatsiginngilaq. Sulisitsisut Peqatigiiffiat nutaamik misissuisitsereersorlu tamanna paasinarsivoq.

Misissuinermi piffissami januaarip 28-anniit marsip 21-annut ingerlanneqartumi,  inuusuttut suli amerlanerusut ilinniakkamik aallartitsisartut paasinarsivoq. Niuernermik Allaffissornermillu ilinniagaqartuinnaat eqqarsaatigalugit ilinniartut marloriaatinngorsimapput.

Misissuineq nunatsinni suliffeqarfinni 321-usuni apersuinernik tunngaveqarpoq.

Niuernermik allaffissornermillu ilinniagaqartut amerleriarsimaqisut misissuinerup paasinarsisippaa. Ukioq manna ilinniartut aallartissimasut amerlassusaasa suliffimmillu sungiusartunik atorfinitsitsinissamik naatsorsuuteqarnerit ukioq kingullermut naleqqiullugit marloriaatinngorput. Tassa 2010-mi 95-niit ukioq manna 188-nut.

Ilinniakkaminnik ingerlatsisut amerlassusaasa naammassinnissimasut amerlassusaannut sanilliunneqarnerat, Sulisitsisut Peqatigiiffiata misissuinerata aamma ersersippaa. Tamatumanilu akunnittarfiit neriniartarfiillu aamma Takornariaqarneq Tunisassiornerlu qaffasinnerpaamik inissisimapput. Sammivinni taakkunani marlunni ilinniagaqarsimasut amerlanerusunik ilinniartoqartarput.

Taamaattorli Sanaartornermik suliallit sulisoqarnersaapput amerlanerpaanillu atorfinitsitserusullutik. Tamanna tunngavigalugu Sulisitsisut Peqatigiiffiata eqqoriarpaa, maannakkorpiaq 344-t ilinniakkamik aallartitsisimasut ukiullu matuma ingerlanerani inuusuttut suli 100-t atorfinitsinneqarnissaat naatsorsuutigineqarpoq.

Suliffeqarfiit Sulisitsisut Peqatigiiffiannut ilaasortaasut katillugit 543-nik ilinniartuuteqarput naatsorsuutigineqarlunilu suli 160-it ukioq manna ilinniartutut aallartissinnaajumaartut.