Præsidenti atsiorumanngimmat aningaasaqarneq akornuserneqarpoq
Inatsit Islandimi inatsisartut akuerereeraluarpaat. - Islandimi aningaaseriviup Icesave-p akiliisinnaajunnaarneratigut Tuluit Hollandimiullu tassani aningaaserivimmiittuutillit aningaasaatitik tamaasa annaavaat taamaalilluni Island 26 milliardit koruuninik taarsiisussanngorluni, inatsillu taanna tamatumunnga akuersissutaagaluarpoq. Islandimi innuttaasut taamaasillutik aningaaserivimmiittuuteqarsimasunut 320.000-inut tamarmik 90.000 koruuninik akiiligassaqarput.
Inatsilli taanna præsidentip atortussaajunnaarsimmagu Islandimiut taarsiisussanngortinneqarput. DR-imi tusagassiortup Københavnimi niuernermik ilinniarfimmi CBS-imi professori, Jesper Rangvid aperaa Islandip præsidentiata naaggaarnera qanoq Islandimiunut isumaqarnersoq.
- Sivitsulaarpat qanoq pisoqassanersoq takoqqaarallartigu imaassinnaavormi inatsit innuttaasunut taasissutigineqarluni akuerineqartoq. Akuerineqassanngippalli naalakkersuisunut apeqqutinngornikuummat tassa atortussaajunnaartinneqassaaq, taamaasippallu Island naalakkersuinikkut paatsiveeruffiussaaq.
Taassuma saniatigut Island EU-mut ilaalerniarluni qinnuteqarsimasoq qinnuteqaammi akueritinnissaanut ajornartorsiornerulissaaq, tassami Tuluit Nunaata Hollandillu, EU-mut ilaasortaareersut, ilaasortanngornissamut isumaqatigiinniarnerit ajornasaarfiginerulersinnaavaat. Nunarsuarmioqatigiillu aningaaserivissuannut IMF-imut Islandip suleqateqarnera aamma ajornartorsiorfiunerulissaaq.
Danmarki aamma Islandimut aningaasaliisimavoq. Nunammi avannaamioqatigiit ikiuiniarnerannut Danmark peqataavoq Islandimiullu 3,7 milliarder koruuninik aningaasaliiffigisussaallugit. Islandili nunat assigiinngitsut akornanni isumaqatigiissutigisaminit tunuartilerpat Danmarkip aningaasaliissutit sinneri akilerumaarneraat maanna apeqqutaalerpoq. Islandimiut aningaaseriviata sullitami 320.000 koruuniusut annaasaat pillugit Islandimi inatsisartut qularnaveeqqusiiniarlutik augustimi neriorsuimmata alloriarneq pingaaruteqaraluaqaaq.
