Præsident Obamap hash-i Amerikkami inerteqqutaajunnaartippaa
Oqarasuaatinik sianertuartunik akisartut pingasut ulapissuataarput, sianertullu pisiniartitsisunut nuunneqartarlutik. Maani, Green Crossimi, tuniniagaat tassa hashi, imaluunniit marijuana, tassa hashiliarineqartartup naasup pilutai. Assigiinngitsulli amerlaqaat.
Pisiniartitsisut nerrivianni dollarerpassuit takutippaat tunisaqarluartut. Obama præsidentinngunngikkallarmat tuniniaasut uku politiinit tigusarineqarnissartik annilaangagijuarlugu inuugaluartut, maanna eqqissillutik inatsisinik unioqqutitsinatik tuniniaasinnaalerput.
Obamammi unnerluussissuserisua, Eric Holder, oqarpoq, nakorsaataarniarfittut ingerlasut, Green Crossitut ittut malersorneqarunnaassasut, kinaluunniillu nakorsamiit katsorsaatissatut hashisisinnaasutut akuersissummik peqaruni pisisinnaavoq. Taamaammat Green Crossimik piginnittoq, Kevin Reed, ulapinnerarpoq.
Kevin Reedilu oqarpoq, hashimik marijuanaluunniit pisisut iluarinngippassuk taarsersinnaasarlugu, soorlu nakorsaataarniarfinni allani aamma taamaattartut. Green Crossitut ittut pisiniarfiit præsidentiusimasup George Buship, akuerisinnaannginnamigit hashitortartut politiinit malersortittuarsimavai, akuttunngitsunik misissuiartortarnikkut arsaarinnittarnikkullu.
Taamatulli politiit malersuiuarnerat akisuallaaqimmat unnerluussissuserisup nutaap Californiami pisiniarfeeqqat ammaannarsinnaanngortippai, pujortataarusuttullu nakorsamik katsorsaatitut marijuanasisinnaasutut akuersissummik tunniusserisuttumik nassaarsinnaasut, eqqissillutik pisiniariarlutik pujortataarsinnaanngorput, inatsisinik unioqqutitsinatik.