PPK unioqutsitsineraavoq
Namminersornerullutik Oqartussat akissarsiat pillugit Isumaqatigiinniartarfiat isumaqatigiissutaareersunik unioqqutitsinerarneqalerpoq. Unioqqutitsinerlu tunngavigalugu Peqqinnissaq Pillugu Kattuffiit siorasaarilerpoq, atorfilinnut tunngatillugu isumaqatigiissitsiniarnikkut aalajangiisitsisoqassasoq.
Namminersornerullutik Oqartussat Isumaqatigiinniartarfiata isumaqatigiissutaareersut tunngavigalugit akissarsiatigut aaqqiiniarnera naammaginagu arriippallarnerarlugulu, tamannalu pillugu saaffiginnissutaasunut akissutigineqartartut naammagiunnaarlugit, Peqqinnissaq Pillugu Kattuffiit atorfilinnut tunngatillugu isumaqatigiissitsiniarnikkut aalajangiisoqaqqusinissamik maanna siorasaaruteqarpoq.
-Akissarsiatigut siornali septembarimi isumaqatigiissuteqarnerup kingorna suliassat arfineq pingasut qangali aaqqereerneqarsimasussaagaluit manna tikillugu suli naammassineqanngillat, suliassallu taakku ilaat ukiunik arlaqartunik pisoqaassuseqarput, Peqqinnissaq Pillugu Kattuffiit siulittaasua Birtha Bianco ilisimatitsivoq.
Isumaqatigiissuteqarnerup kingorna isumaqatigiinniartarfiup isumaqatigiissutaareersunik allatut paasinninni tunngavigalugu, assersuutigalugu peqqissaasut kandidatitut masteritulluunniit ilinniagaqarsimaneri tunngavigalugit assigiinngitsunik akissaatitigut aaqqissuteqarsimavoq, tamatumalu kingunerisaanik akissaatitigut aaqqiissutaasut tunniuteriarlugit uterteqqissimallugit, tamanna Peqqinnissaq Pillugu Kattuffiannit kipiluttunarttutut isumaqatigiissutaasunillu unioqqutitsinertut isigineqarpoq. Pisut tunualiaqutaralugit Peqqissaasut Kattuffiat ukioq manna juunimi juulimi septembarimilu Namminersornerullutik Oqartussanut ataatsimeeqateqarusullutik saaffiginnittarnitik iluamik akineqartarsimanngitsut Birtha Biance ilisimatitsivoq.
Namminersornerullutik Oqartussani Isumaqatigiinniartarfiup pisortaa Peter Bech radioaviisimut ilisimatitsivoq Peqqinnissaq Pillugu Kattuffiit unioqqutitsineraanera eqqunngitsuusoq, suliassallu pineqartut ilaat maanna aaqqiivigineqareersut.
Peqqinnissaq pillugu Kattuffik peqqissaasut, aaversittarfinni sulisut, pilorissaasut, tagiartuisartut allallu taanna kattuffigaat.
Peter Bech ilisimatitsivoq Peqqinnissaq pillugu Kattuffiit saaffiginnissutaa juulimili akineqarsimasoq, taamanilu suliassat aarriisaarunneqartut aaqqinneqarnissaata tungaanut ingerlaavartumik ataatsimeeqatigiittarnissamik neqerooruteqarsimallutik, Peqqinnissaq pillugu Kattuffiannit akineqanngitsumik. Oqaatigaalu katuffik ullumi aamma akineqartoq, juulimi akissutip assiganik neqeroorfigineqarluni.
