PPK: Assigiinngisitsiniarneq pillugu isumaqatigiinniarneq unippoq
Peqqinnissaq pillugu Kattuffiit PPK aamma Namminersornerullutik Oqartussat akissarsiat pillugit isumaqatigiinniarnerat arfininngornermi ullaakkut qulingiluanut aallartittoq nalunaaquttap akunneri 17-it ingerlareersut unittoorpoq, illuatungeriit naapeqatigiissinnaajunnaarmata. Peqqinnissaq pillugu Kattuffiit PPK-p peqqissaasullu peqatigiiffianni siulittaasoq Karin Holler pisut pillugit ima oqarpoq.
- Suna tamarmi ajalusoorpoq, aningaasarsiat pillugit nutaamik isumaqatigiissuteqanngitsoorpugut. Nangissagutsigu nalulluinnarpara qaqugu isumaqatigiinniaqqissanersugut, Karin Holler oqarpoq.
Peqqinnissaq pillugu Kattuffiup PPK-p peqqissaasut, peqqinnissami ikiortit allallu peqqissaavinni sulisut – nutaamik isumaqatigiissusiuukkaluarpai.
- Piumasaqaatigut assigiinngitsut 20-t, aningaasarsiat qaffannissaannut, meerartaarnermut atatillugu sulinngiffeqarnerit sivitsornissaannut, ullut feeriarfiit amerlinissaannut allarpassuarnullu tunngasut isumaqatigiissutigereerlugit atsiornissatsinnut piareeruttorluta, Namminersornerullutik Oqartussat siunnersuuteqarput uagut akuersaarsinnaanngisatsinnik, Karin Holler nassuiaavoq.
- Akuersaarsinnaanngisarput tassaavoq assersuutigalugu peqqissaasutut sulilersussat immikkut ittumik isumaqatigiissusiorfigisarnissaannik sulisitsisut piumasaqarnerat. Uagut kattuffiuvugut, taamaammat assigiinngisitsiniarneq taamaattoq akuersaarsinnaanngilluinnarparput, nangipporlu:
- Napparsimmavinni suleqatigiit ukiuni kingullerni vikarerpassuaqartarneratigut assigiinngisitsineq malugisareerpaat, pingaartumik nunaqavissut tamanna malugisaraat tusartaannarparput. Peqqinnissaq pillugu Kattuffimmit akuerisinnaanngisarput tassaavoq assigiinngisitsinertut ittumik nunaqavissut misigititaaqqinnissaat. Ulluinnarni suleqatigiittussat akornanni annerusumik ”kussiniliortoqartariaqanngilaq”. Sulisitsisut-una taanna piumasarimmassuk uagut akuerisinnaanngikkipput. Assigiinngisitsineq atorunnaarsittariaqarmat tamatta assigiimmik pineqarnissarput piumasaraarput, Karin Holler naggasiivoq.
Namminersornerullutik Oqartussani isumaqatigiinniarnermut immikkoortaqarfimmi pisortaq Palle Frederiksen oqaaseqartinniaraluaratsigu iluatsitsinngilagut.
