Powell nunatsinnut pingaaruteqarpoq

Sakkutuut naalagarsuat 67-nik ukiulik, sakkutuutut qaffasissutsimigut sisamanik ulloriaasalik, USA-milu nunanut allanut ministeriunerminit tunuarniarluni nalunaaruteqaqqammersoq, Colin Powell, nunatsinni ilisarisimaneqalerpoq USA-p Danmarkillu illersornissamut isumaqatigiissutaat atsioriartorlugu  Igalikumut aasaq tikeraarami.

Illersornissamut isumaqatigiissutip nutarterneqarnerani Colin Powell pingaarutilimmik inissisimavoq, tamannalu namminersornerullutik Oqartussanut pingaartuusimasoq nunanut allanut pisortaqarfiup pisortaa isumaqarpoq.

- Colin Powellip suleqatiginera nuannaarutigeqaarput, pissutigalugu Kalaallit Nunaat nunarsuarmioqataasutut malunnaatilimmik malunnartinniarmagu, Mikaela Engell oqarpoq.

 Igalikumi nunaqarfimmi aqutsisut siulittaasuata Mouritz Karlsenip pisoq pingaarutilik aamma eqqaamavaa.

- Inuit akisussaafilerujussuit tikeraartoralugit nuannersorujussuuvoq pissanganarlunilu. Tikinnerani assammippara tikilluaqqullugulu, nerrinnitsinni allattaalu nerriveqatigaavut. Tikeraarnini nuannareqaa, USA-mullu uterami qujassuteqarluni allagaqarpoq, taannalu illutsinni assiutigaarput, Mouritz Karlsen unnersiorpoq.