Poul Krarup: Aleqa Hammond inuinnaat naalakkersueqataanerat qaangiinnarlugu iliuuseqarpoq

Taama aalajangiineq isornartorsiorneqarpoq, soorlu aamma Sermitsiap aaqqissuisuunerata Poul Krarupip aalajangiineq isornartorsioraa.

Amerlanerussuteqartut naalakkersuisuutitaqarnissaat avaqqullugu ataatsimeeqataannginnissamik aalajangiisoqartoq, taassuma oqaatigaa:

- Inuinnaat naalakkersueqataanerat ataqqillugu Inatsisartut Nunanut Allanut Sillimaniarnermullu Ataatsimiititaliaanni oqallisigeqqaartussaagaluarpaa, Kalaallit Nunaannut sunniuteqangaatsiarsinnaammat, Sermitsiap aaqqissuisuunera Poul Krarup oqarpoq, nangillunilu:

- Sulisitsisuni, tassa Inatsisartut, qaangiinnarlugit iliuuseqarpoq. Inatsisartut Naalakkersuisunut sulisitsisuupput, Naalakkersuisut Inatsisartunut sulisitsisuunatik. Inatsisartut ilisimatiinnarnarneqarnissaat naammanngilaq. Oqaloqatigisariaqarpai, amerlanerussuteqartullu isumaqatigissappassuk aatsaat aalajangiissalluni, Poul Krarup oqarpoq.

Siunnersuisoqatigiit ataatsimiinneranni peqataaniarnani aalajangiineq, nunani tamalaani politikkimik immikkut ilisimasallip Margrethe Sørensenip, aamma isornartoqartippaa.

Aleqa Hammondip periarfissat allat ujartoqqaarsimasussaagaluarpai, peqataannginnissamik aalajangiineq kingulliutillugu, oqarpoq:

- Pissutsit allanngortinneqarnissaat pillugu sivisuumik aatsaat suliniuteqareersimallunilu iluatsissimanngikkaanni taama aalajangiisoqarsimasussaagaluarpoq. Tassa ataatsimiinnermut peqataannginnissamik aalajangiineq kingulliullugu aatsaat periarfissaasimasussaagaluarpoq, Margrethe Sørensen oqarpoq.

Taama sakkortutigisumik, nunamullu immaqa ajortumik sunniuteqarsinnaasumik taama sakkortutigisumik aalajangiisarneq Kalaallit Nunaanni atorneqarneq ajoraluartoq, taassuma oqaatigaa, pisut sukumiinerusumik oqallisigeqqaarlugit aalajangiisarnerup pingaartinneqarnera oqaatigalugu.

Naalakkersuisut siulittaasuata taama aalajangiinera illuatungaatigut aamma kinguneqartoq, Sermitsiap aaqqissuisuunerata oqaatigaa:

- Aleqa Hammondip taama aalajangiinera pissutigalugu ajornartorsiut maluginiarneqalerpoq, oqallisigineqalerlunilu. Ajornartorsiut eqqumaffigineqalerpoq, isumaqarpungalu tamanna pingaaruteqartoq, Poul Krarup oqarpoq.

Nunatta Issittumi Siunnersuisoqatigiit ataatsimiinnerannut peqataajumannginnera, Naalagaaffeqatigiinnerup iluani pissutsinut ilaammat, Sverige aamma Canada akuliukkumanngillat, taamatullu inissinnerat Poul Krarupip paasisinnaalluarpaa. Tassami naalagaaffit tamarmik immikkut ataatsimik inissaqarmata, naak inuiaqatigiinni naggueqatigiinnik ikinnerussuteqartunik aamma innuttaasoqaraluartut. Nunatsinnullu atatillugu allaanerussuteqartoq oqaatigaa:

- Kalaallit Nunaanni pissutsit allaapput. Kalaallit Nunaat matumani nammineq aalajangiisinnaassuseqartuuvoq, Issittumimi inissisimammat. Taamaammat Danmarkip Issittumi Siunnersuisoqatigiinni inissani Kalaallit Nunaannut tunniuttariaqarpaa, Sermitsiap aaqqissuisuunera Poul Krarup oqarpoq.

Aleqa Hammond ullumi oqaseqartinniaraluarparput iluatsinnaguli.

Taanna nunat avannarliit ministeriunerisa Stockholmimi atatsimiinneranni peqataavoq.