Portøritut ilinniartoqarsinnaalissaaq
Portøritut annaassiniartartussat tunngaviusumik paaqqinninnermi suliassat, napparsimasunik utoqqarnillu nuussineq, ambulancenik angallassineq, inuunermik annaassiniarluni ikiueqqaarneq assigisaallu suliarisassavaat.
Ilinniarneq inuutissarsiutinut tunngaviusumik ilinniakkanut ilaavoq, sapaatillu akunnerini 22-ni ingerlanneqartassalluni.
Ilinniagaqalernissamut piumasarineqartut tassaapput:
Meeqqat atuarfiannit kalaallisut qallunaatullu minnerpaamik 7-imik aammalu kisitsinermi matematikkimilu 6-imik karaktereqarluni naammassinnissimaneq. Taakkualu saniatigut biilersinnaanermut allagartaqarneq, pillagaasimannginnermut uppernarsaammik allagartaqarneq issittumilu ikiueqqaarnermi tunngaviusumik pikkorissarnermik naammassinnissimaneq.
Ilinniarnermi atuarneq suliffimmilu misiliineq paarlakaallugit ingerlanneqassapput, sungiusarneq sinerissami napparsimavinni ingerlanneqartassalluni.
