Portøritut ilinniagaqarneq sivisunerusoq ujartorneqarpoq

Portørit siunissami nakorsaatinik anniarunnaarsitsisartunik nakorsaasiisinnaanngorlugit portøritut ilinniartitaanerup annertusineqarnissaannik aallartitsinissamik Naalakkersuisut peqquneqarnissaanik Inatsisartut aalajangiiffigisassaattut siunnersuuteqarsimapput.
 
Siunnersuulli inatsisartuni ilaasortat tamarmik itigartitsissutigaat. Itigartitsinermut peqqutaasut ilagaat peqqinnissaqarfimmi aqutsisut naliliisimanerat naapertorlugu ajutoortoqartillugu portørit nakorsanik ajutoorfimmut ilagineqartarmata, aamma ilinniartitaaneq annertunerulersinneqassappat ilinniarneq sivitsorneqartariaqassammat, taamaalilluni aningaasaliisoqarnerusariaqassalluni.
 
Portørilli ilinniarnerminni qaffassarnissartik pisariaqavissutut suaarutigaat.
 
Ukiuni 14-ininngortuni portøritut sulisoq Jørgen Ingemann allakkamini ima allappoq. Issuaaneq aallartippoq.
 
- Uagut portøriusugut Ilinniartitaanermut Naalakkersuisup Nick Nielsenip oqaariserisai akerlilerpagut. Tassa ajutoortoqartillugu nakorsaq ilaajuaannartoq oqaatigaa. Uagut tungitsinniit oqaatigisinnaanngilarput tamatigut nakorsaq ilaajuaannartoq. Uanga nammineerlunga ukiuni 14-ini sulininni nakorsaq taamaallaat pingasoriaannarluni ajutoorfimmi suleqatiginikuuara.
 
Portøri Jørgen Ingemann tusagassiuutitigut nalunaarutimini ilaatigut taama allappoq.
 
Taassuma ilanngullugu eqqaavaa ajutoortoqartillugu portørit ajutoortoq piaarnerpaamik ornittaraat, ajutoortorlu piaarnerpaamik napparsimaviliaanneqartartoq. Assersuutigalugu uummammi unittoorsimasoq piffissaq sukkanerpaaq aaneqartarpoq, ingerlaannarlu napparsimaviliaanneqartarluni. Aatsaallu napparsimavimmi uummarsaaneq aallartinneqartarluni. Jørgen Ingemannillu eqqaavaa taamaaliornikkut aannaassiniarneq ilaannikkut kingusinaareertartoq.
 
Jørgen Ingemann isumaqarpoq ilinniartitaaneq qaffasinnerusoq pisariaqavissoq. Inunnik amerlasuunik annaassisarnissaq siunertaralugu.
 
Jørgen Ingemann kisimi portøritut ilinniarnermi annertussisiliinissaq suaarutiginngilaa. Hans Hendrik H. Isaksen portøriusoq aamma isumaqarpoq portørit ilinnikkaminnik qaffassartarnissaat pisariaqartoq. Portøritut ilinniarsimanngitsut arlallit akisussaaffimmik annertuumik tunineqartartut  arlaleriarluni naammattoortarsimavaa
 
Portøritut ilinniarneq sapaatsip akunenrini 22-ini ingerkanneqartarpoq.
Atortorissaarutigut ajutooqqaneq pissutigalugu Naalakkersuisunik Inatsiartunillu oqaaseqartitsisinnaasimanngilagut.