Portørit siunissartik pillugu peqatigiiffiliulerput

Portørit siunissami nakorsaatinik anniarunnaarsitsisartunik nakorsaasiisinnaanngornissaat anguniarlugu, annertusisamik ilinniartitaasalernissaanik siunnersuut Inatsisartuniit aappassaanik itigartitsissutigineqarpoq.
Allattoq Dorthea Johansen
maajip 09-at 2014 05:39

Siunnersuuteqartup Inatsisartuni ilaasortap Doris Jakobsenip portørit peqatigiiffiliornissaannik kaammattorpai. Portørillu tusaaneqarnissartik anguniarlugu peqatigiiffimmik aallartitsiniarlutik aalajangersimapput.

- Inatsisartut ukiakkut ataatsimiinnissaannut peqatigiiffiliussaagut. Taamaalilluta portøriusugut ataqatigiiaarluta niperput siammasinnerusumik tusartinniarlugu piareersassaagut. Taamaaliornikkut aiunnersuutissap nutaap imaqarniliassaa qulequtassaalu taamaalluta piareersimaffigikannersinnaassavarput, Dronning Ingridip napparsimavissuani portøri Hans Hendrik Isaksen oqarpoq.
 
Portørit siunissami nakorsaatinik anniarunnaarsitsisartunik nakorsaasiisinnaanngornissaat anguniarlugu, annertusisamik ilinniartitaasalernissaanik siunnersuut Inatsisartuniit aappassaanik itigartitsissutigineqarpoq. Siunnersuummi paasissutissat ilisimasallu annikippallaarneri itigartitsinermut pissutaapput.    
 
- Isumaqarpunga ajuusaarnartorujussuusoq siunnersuutip itigartitsissutigineqarnera. Pissutigalugu ilisimasaqarnerup killeqarneranut isumaqarpunga siunnersuutip akuersissutigineqarsimagaluarpat pitsaassutsimik annertusaaqataasinnaagaluartoq portørit inuiaqatigiinnut sullissineranni, Inatsisartuni ilaasortaq siumumeersoq Doris Jakobsen oqarpoq.
 
Portørit tusaaneqarnerulernissartik nukittunerulernissartillu anguniarlugu peqatigiiffiliornissartik anguniarpaat. Peqatigiiffeqalernerup kingorna ilisimasanik amerlanerusunik pissarsisoqartalernissaa anguniarneqarpoq
 
Portørit ilinniakkaminik qaffassartalernissaanik siunnersuut Inatsisartut ukiakkut ataatsimiilerpata siunnersuutigeqqinneqassaaq. Tassani siunnersuuteqartussat ataatsimik amerlanerussapput. Siumumut illuatungiliuttut Demokraatit siunnersuummut suleqataaniarlutik neriorsuisimapput.
 
- Demokratit suleqatiginnikkusunnerat tigulluarpara. Isumaqarpungalu ukiamut siunnersuummik nutaamik saqqummiussinissamut  partiit allat suleqatigissallugit.
 
Doris Jakobsenip portørit peqatigiiffiliorniarlutik aajalangerat nuannaarutigaa.
 
- Portørit peqatigiiffiliornissaat nuannaarutigivara, isumaqarama peqatigiiffiliornikkut taamatut nukittorsaaqataajumaartunga siunnersuutit piviusunngortinnissaannut, Doris Jakobsen oqarpoq.
 
Portøritut ilinniarneq qaammatini tallimani sivisussuseqartarpoq.