Portørit atugaat assigiinngillat

Peqqissutsimut Naalakkersuisup Agathe Fontainip, sinerissami napparsimmavinni tamatigut portørinik marlunnik pigaartoqartarnissaanik malittarisassaqalernissaa itigartitsissutigaa. Demokraatineersup Astrid Fleischer Rex-ip § 37 najoqqutaralugu apeqqutaanut akissutaani tamanna atuarneqarsinnaavoq.
Allattoq Elisa Isaksen
decembarip 30-at 2011 06:36

Agathe Fontainip erseqqissarpaa, nuna tamakkerlugu napparsimmavinni portørinik sulisoqarneq assigiinngisitaartuaannarsimasoq. Aamma portørit pigaartuusartut ikinnerpaamik qassiunissaannik aalajangersimasumik malittarisassaqanngitsoq. Tamannami illoqarfinni assigiinngitsuni pissutsit illoqarfiillu qanoq inuttutiginerat apeqqutaatillugit aalajangersarneqartarmat.

- Missingersuutit, napparsimmaveqarfinni suliassat aaqqissugaanerlu tunngavigalugit, aamma napparsimmaveqarfinni sulisut tamarmiusut sulinerat qanoq aaqqissuunneqassanersut pillugit najukkami aqutsisuusut aalajangiisarput. Matumani napparsimasunik sullissinerup siunertamut naapertuuttumik naammassineqarsinnaanissaa anguniarneqartarluni, Agathe Fontain allappoq.

Tamatumunngalu peqatigitillugu oqaatigalugu, nammineq naalakkersuisoqarfimmini, imaluunniit Peqqissutsimut Pitsaaliuinermullu Aqutsisoqarfiup illoqarfinni ataasiakkaani portørinut tunngasunik aaqqissuussinerit ajornartorsiuteqarfiunerinik tusagaqarsimanatik. Taamaattumillu aaqqissuussinermik allannguinissamik maannamut pilersaaruteqartoqanngitsoq.