Portugalimi illoqarfissuarni unnuakkut aneqqusaasoqassanngitsoq
Portugal illoqarfiit ilaanni, soorlu illoqarfiit pingaarnersaanni Lissabonimi illoqarfissuarmilu Portomi, unnuakkut aneqqusaannginnermik ataasinngornermit atuutilersitsivoq.
Portugalip ministeriunera, Antonio Costa, sapaatiummat ullaassakkut taama nalunaarpoq.
Coronavirus siaruatsaaliniarlugu taamaaliorpoq.
- Coronavirusip nunarsuaq tamakkerlugu tunillaassuuttoq siaruatsaalinissaanut tamaviaartariaqartugut qularutigineqassanngilaq, ministeriuneq tusagassiortunik katersortitsinermi oqarpoq.
Unnukkut nalunaaqutaq aqqanermit ullaassakkut nalunaaqutaq tallimanut aneqqusaasoqassanngilaq.
Portugal ullumimiit ulluni 15-ini ajornartoorfeqarfittut nalunaaruteqarfiulissaaq, aneqqusaannginnerlu Portugalip kommuniinit 308-usunit 121-ni atuutissalluni.
AAMMA ATUARUK Nunarsuarmi inuit coronavirusimik tunillanneqarsimasut 50 millionit sinneraat
Portugalimi inuit 70 procentiisa missaat kommunini 121-ni najugaqarput.
Sapaatit akunnerisa naanerini marlunni tullerni aneqqusaannginneq sukannernerussaaq.
Arfininngornerni sapaatinilu ullukkut nalunaaqutaq ataatsimiit atuutilereertassaaq.
Portugalimi inuit 10 millionit sinnilaarpaat. Tassani tunillatsittut toqusullu Europami nunanut allanut sanilliullugu ikinnerupput. 173.540-t coronavirusimik tunillatsissimasutut nalunaarsorneqarsimapput, 2848-llu virusimik toqquteqarsimasutut nalunaarsorneqarsimallutik.
Inuilli 6640-t tunillatsissimasutut arfininngormat paasineqarmata, aatsaallu taama maannamut amerlatigimmata killilersuinerunissamut aalajangertoqarpoq.