Portørit suleqatigiissitanik pilersitsisut
Nuummi Dronning Ingridip Napparsimmavissuani portørit sulinerminni atukkatik naammagiunnaarlugit sulinerminnik unitsitsigallarniareersullu portørit Peqqissutsimut Aqutsisoqarfimmi pisortaq Joanis Erik Køtlum ippassaq tallimanngorermi ataatsimeeqatigaat, ataatsimiinnerlu pissarsiaqarfigilluarlugu portørit oqaaseqartitaata Ujarak Jessen Heinrichip oqaatigaa:
- Ajunngitsumik oqaatigisassaavoq, pissarsiaqarfiulluartutut oqaatigineqarsinnaavoq, tassa tamatsinnut pissarsiaqarfiusumik ataatsimiippugut. Aallartinnitsinni pisortaaneq peqataagami. Taava oqariartuutivut apuuppavut, tusarnaarpaatigut aamma paasinnilluarluni, kisianni neriorsuuteqarsinnaanani oqarpoq, paaseqatigiilluarpugulli, Nuummi Dronning Ingridip Napparsimmavissuani portørit oqaaseqartitaat Ujarak Jessen Heinrich taama oqarpoq.
Suleqatigiissitaliamik pilersitsisut
Portørit Kalaallit Nunaanni Peqqissutsimut aqutsisoqarfiup pisortaa Joanis Erik Køtlum ippassaq tallimanngornermi ataatsimeeqatigivaat, suleqatigiissitaliamillu tassani ilaatigut pilersitsisoqarluni.
Portørit pisortanut apuunniakkatik suleqatigiissitaliaq aqqutigalugu apuuttassavaat, tamannalu portørinut isumallualersitsivoq:
- Isumallarnartoqarpoq, tusarnaarumalluni neriorsuigami, taava aamma suleqatigiissitamik pilersitseriaruttagooq, taanna ataasimeeqatigisarniartussaassagamiuk. Taava taanna pilersipparput. Peqatigiiffittupajaaq ingerlassaaq, atukkavut pillugit pisortanut assigiinngitsunullu saaffiginnittarnissat taavalu aamma ulluinnarni atukkat pitsanngorsaaviginiarneranni suliniuteqarnissaq siunnersuusiortarnissarlu ilaalu ilanngullugit,
Nuummi Dronning Ingridip Napparsimmavissuani portørit oqaaseqartitaat Ujarak Jessen Heinrich taama oqarpoq.