Sulinermik unitsitsigallarneq: Portørit pissangarpasillutik ataatsimiigiarput
- Qanoq pisoqassanersoq nalugallarparput. Utaqqimaarpugut, oqaaseqartartoq Hansine Thorin, portørit nal. 12-imit 16-iut ataatsimiiffissaannut iseriartorluni taama oqarpoq.
Portørit akissarsiat pillugit sulisitsisuminnut Namminersorlutik Oqartussanut suli isumaqatigiissuteqartoqannginnera naammagiunnaaqqavaat.
KNR-p ilanngutassiortua, Mathies Hvid Toft, napparsimmavissuup saani nikorfavoq, taannalu oqaluttuarpoq pissangasoqarpasittoq.
- Ataatsimiinnissap ilungersunartuunissaa malugineqarsinnallurpoq, taama oqarpoq.
AAMMA ATUARUK Illoqarfinni arfinilinni portørit sulinerminnik unitsitsigallarniartut
- Pingaarnertut oqaluuserineqartussaq tassaavoq portørit akissarsiaminnut tunngatillugu sunik piumasaqaateqarniarnersut. Arlallit oqaatigaat akileraarutit ilanngaatiginagit 19.000 koruunit missaannik akissarsiaqarlutik. Taamaammat ilaat portøritut sulinermik saniatigut taxaertitsisuusariarput akissaqarumallutik, Mathies Hvid Toft taama oqaluttuarpoq.
Sulinermik unitsitsigallarneq ataasinngorpat nanginneqassanersoq portørit aamma isumaqatigiissutigissavaat.
Napparsimmavissuarmi portørinit 24-usunit 20-t missaanniittut ullumi ataatsimeeqataapput.
AAMMA ATUARUK Peqqinnissaqarfiup Aqutsisoqarfia piareersaateqartoq
Illoqarfinni allani arfinilinni portørit nal. 12-imit 16-imut sulinermik unitsitsigallarneq aamma peqataaffigaat. Tassalu Uummannami, Ilulissami, Sisimiuni, Maniitsumi, Narsami Qaqortumilu.