Portørit pikkorissartinneqarpiarneq ajorput!

Sinerissami portørit pikkorissartinneqartarnerat ukiut ataasiakkaarlugit sivisunerpaamik pisartussaavoq. Maniitsumi portørit ittuata Peter Jørgensenip kingullermik pikkorissartinneqarnertik sivitsungaarmat qangarpiaanera eqqaamanngilaa.

Peter Jørgensen aperaarput ukiut qassit napparsimavimmi portøritut sulisimanersoq.

-Ukiut arfineq-pingasunngussavakka aasamut.

-Ukiut arfineq-pingasut ingerlaneranni, qanga kingullermik tunngaviusumik portøritut pikkorissartitaavit?

-Ukiut sisamat qaangiukkunarput, kingullermi pikkorissarama.

-Ukiut sisamarsuit matuma siorna? Eqqaamasinnaavigimmi tamaasa?

-Sulileraangama takkussuuttarput, kisianni assersuutigalugu, sungiusaassaguma iluamik eqqaamasinnaarpianngilakka.

-Qanoq isumaqarfigaajuk taamak piffissami sivisutigisumi pikkorissarnerup tungaatigut nutarterneqarnani?

-Aappaatigut ilungersunalaartarpoq, suli pikkorinnerorusunnartarami, pikkorissaqqittarsinnaasuugutta suli immaqa sullerinnerullutalu pisassagaluarpugut.

-Tamanna inunnut ikiortariaqartunut qanoq kinguneqarsinnaasoraajuk?

-Soorunami kingunipiloqarsinnaavoq, pikkorissartanngikkutta arlaatigut inunnik navianartorsiortitsisinnaavoq.

-Qullersavit tungaaninngaanniit qanoq iliortoqartariaqaraluarpa?

-Minnerpaamik ukiumut ataasiarluta nutarterneqartartussaagaluarpugut, Peter Jørgensen oqarpoq.

Maniitsumi Peqqissaasut ningiuat Lene Møller tamanna pillugu oqarpoq, sooq taamaappiarnera iluamik ilisimanagu. Ilimagaali, pikkorissartitsinermut tunngatillugu allanngortiterisoqarsimanera peqqutaasimassasoq.