Porno-imik nuannarisallit Island-imi katersuutilersut
Inuit atoqatigiittunik pornomik sammisallit nunanit tamalaaneersut 150-inik amerlassusillit qaammatip tulliani Islandimi katersuutissapput.
Ataatsimiinneq marsip 7-annit 11-annut ingerlanneqartussaq aappassaa taamatut aaqqissuussineruvoq, aaqqissuisoralugit Hollandimiut pornomut tunngasunik internetikkut nittartakkamik ingerlatsisut, pornomik filmiliaritittartunik nalunaarsuisartut.
Reykjavik-imi borgmesterip Vilhjalmur Vilhjamssonip “ajuusaarutigaa”, ataatsimeersuarneq Reykjavikimi ingerlanneqassammat, tassa borgmesteri naapertorlugu Islandimiut inatsisaat malillugit inerteqqutaasunik sammisaqarfiunissaa ilimagineqarsinnaammat, borgmesterip oqaaseqartitaa, Christine Arnadottir, franskit nutaarsiassaqartitsiviannut AFP-mut oqarpoq.
- Borgmesterip Islandimi pornomut tunngasunik tunisassiornerup siaruariartornera unitsikkusuppaa. Ataatsimeersuarnissaq illoqarfimmut tikilluaqqusaanngilaq, Arnadottir oqarpoq.
Ataatsimeersuarneq pornomik tunisassiortartut ilisareqatigiinnerunissaannik periarfissiisussatut avammut saqqummiunneqarpoq.
Aaqqissuisut ataatsimeersuarnissartik oqartussanut qinnuteqaatigisariaqanngilaat, feeriarluni katersuunnertut isigerusunnerugamikku.
Borgmester Vilhjamssonip Islandimiut politiivi qinnuigisimavai peqataasussat ataasiakkaat misissorneqassasut, meeqqanik atoqateqarnermut akuunnginnerat qulakkeerumallugu.
